8-9-cu abzasda Səməd Seyidovun fikirləri əlavə edilib (ilk xəbər 15:18-də yayılıb)
Fransa, Strasburq, 28 yanvar /Trend, müxbir A.Məhərrəmli/
Azərbaycanın AŞPA-dakı nümayəndə heyətinin rəhbəri əmindir ki, Alt Komitənin bərpası Ermənistan-Azərbaycan, Dağlıq Qarabağ münaqişəsinin həll olunmasında böyük rol oynayacaq.
"AŞPA Bürosunda Dağlıq Qarabağ üzrə Alt Komitənin fəaliyyəti Azərbaycan həqiqətlərinin dünyaya çatdırılmasında böyük rol oynayacaq və biz də bunun üçün əlimizdən gələni edəcəyik", - Trend-in məlumatına görə, cümə günü jurnalistlərə Azərbaycanın AŞPA-dakı nümayəndə heyətinin rəhbəri, deputat Səməd Seyidov bildirib.
Büro Alt Komitənin yenidən fəaliyyətə başlaması haqqında qərar verib və İspaniyadan olan deputat, Liberallar Partiyasının üzvü Jordi Xukla i Kosta yekdilliklə (Ermənistan istisna olmaqla) Komitənin yeni sədri seçilib.
AŞPA-nın Dağlıq Qarabağ üzrə Alt Komitəsi təxminən bir il əvvəl qurumun sədri Lord Rassel Constonun vəfatı ilə əlaqədar öz fəaliyyətini dayandırmışdı. İyunun 21-də başlanan yay sessiyası çərçivəsində Azərbaycan və Ermənistan nümayəndələri görüşərək, Alt komitənin yaradılması məsələsini bir daha müzakirə ediblər. Lakin Ermənistan tərəfinin qeyri-konstruktiv mövqeyinə görə Alt komitə fəaliyyətini bərpa edə bilməyib.
Seyidov qeyd edib ki, Alt Komitənin tərkibinə hər ölkənin həmməruzəçiləri, Azərbaycan və Ermənistanın AŞPA-dakı nümayəndə heyətlərinin həm iqtidar, həm də müxalifətdən olan millət vəkilləri daxil olacaq.
Azərbaycan nümayəndə heyətinin sədri Büroda yalnız Alt Komitənin fəaliyyəti ilə bağlı məsələnin müzakirə olunduğunu deyib.
Səmədov bildirib ki, AŞPA-nın aprel sessiyasında Alt Komitənin toplanması, fəaliyyətinin müzakirəsi və digər məsələlər gündəmdə olacaq.
Deputat deyib ki, Dağlıq Qarabağ üzrə Alt Komitənin yaradılmasının əsası Azərbaycan Prezidenti İlham Əliyev AŞPA-da Azərbaycan nümayəndə heyətinin rəhbəri olarkən qoyulub.
"Prezident İlham Əliyev AŞPA-da nümayəndə heyətinin rəhbəri olarkən, Dağlıq Qarabağla bağlı 1416 saylı qətnamənin əsasını qoyub və o qətnamənin daxilində 1-ci bənd Dağlıq Qarabağ üzrə Alt Komitənin yaradılması ilə bağlı idi. Həmin komitə o vaxt yaradılıdı və fəaliyyət göstərdi, öz səmərəsini verdi. Ancaq Komitəyə rəhbərlik etmiş Lord Rassel Consun vəfatından sonra Ermənistan onun fəaliyyətini dayandırmaq və ümumuiyyətlə, bu Komitənin işini pozmaq və onun lazımsız olması haqqında uzun müddət mübarizə apardı. Biz də öz növbəmizdə mübarizə apardıq. Öz mövqeyimizi ortaya qoyduq. Alt Komitənin yaradılmasına çox səylər göstərdik", - Seyidov deyib.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
BMT Təhlükəsizlik Şurasının Dağlıq Qarabağın və ətraf rayonların işğal olunmuş ərazilərin azad edilməsinə dair qəbul etdiyi dörd qətnamə Ermənistan tərəfindən bu günə qədər yerinə yetirilməyib.