Azərbaycan, Bakı, 15 fevral /Trend, müxbir E.Tarıverdiyeva/
Hazırda Dağlıq Qarabağ münaqişəsinin həlli üzrə ATƏT-in Minsk qrupunun həmsədri olan üç dövlətdən yalnız biri - Rusiya tam gücü ilə işləyərək münaqişəni həll etməyə cəhd göstərir. Bu barədə çərşənbə günü Trend-ə müsahibəsində Rusiyanın İctimai-Siyasi Araşdırmalar Mərkəzinin direktoru Vladimir Yevseyev deyib.
"Danışıqlar prosesində irəliləyişin olmadığını demək olmaz. Amerikalılarda velosiped nəzəriyyəsi var: "hərəkət etməsən, yıxılacaqsan". Bu baxımdan danışıqlar müharibədən daha yaxşıdır", - Yevseyev bildirib.
Ekspert hesab edir ki, Rusiyanın lap kiçik qərarın belə qəbul edildiyi danışıqlar aparması faydalıdır.
"Seçkilərdən danışsaq, məndə böyük ümidvar ki, Fransa Prezidenti Nikola Sarkozi yenidən seçilməyəcək. "Erməni soyqırımı"nın inkarına görə cəzanın tətbiqi ilə bağlı son qanunu qəbul etmək düzgün deyildi, çünki bu qanun bir çox ölkələrə, eləcə də Azərbaycana da toxunur. Buna görə də həmsədrlərin üçlüyündən danışsaq, daha çox Fransadan narazılıq var", - Yevseyev deyib.
Onun fikrincə, ABŞ-a gəldikdə, Vaşinqton hazırda iqtisadi vəziyyətdən narahatdır. Bu gün amerikalılar işsizlikdən və ağır iqtisadi vəziyyətdən əziyyət çəkirlər və prezidentdən vəziyyətin yaxşılaşdırılmasını gözləyirlər.
"ABŞ-ın əsas tərəfdaşı olan Avropa da çox mürəkkəb iqtisadi vəziyyətdədir. Bu, Barak Obama üçün yenidən seçilməklə bağlı ciddi problem yaradır", - Yevseyev deyib.
Ekspertin sözlərinə görə, hazırda Rusiya fəal xarici siyasət yürüdür və bu siyasət çərçivəsində, o cümlədən də Dağlıq Qarabağ üzrə danışıqlar çərçivəsində fəaliyyət göstərməkdə davam edir.
"Bu, Cənubi Qafqaz üçün regionun inkişafına mane olan əsas problemdir və onu dondurulmuş saxlamaq olmaz", - o deyib.
Yevseyev Dağlıq Qarabağ üzrə danışıqların davam etdirilməsini müsbət məqam hesab edir.
"Əlbəttə, Azərbaycan cəmiyyətində yorğunluq var. Əlbəttə ki, Rusiya Ermənistana təsir edə bilər, lakin onun nüfuzu hüdudsuz deyil, ona görə ki, erməni diasporu amili var, xarici oyunçular var. Bundan əlavə, ölkədaxili vəziyyət sabit deyil, indiki halda söhbət Ermənistandan gedir. Qərar qəbul etmək hakimiyyət üçün çox çətindir, çünki bu, hazırkı hakimiyyətin reytinqinin azalmasına gətirib çıxaracaq", - Yevseyev deyib.
