Azərbaycan, Bakı, 27 fevral /Trend, müxbir M.Əliyev/
Kanadadakı "Alberta" Azərbaycan Mədəniyyət Cəmiyyətinin (Alberta Azerbaijani Cultural Society - ALACS) göstərdiyi fəaliyyət sayəsində Kalqari şəhərinin meri Xocalı qətliamı faktını tanıyıb və bu cinayətin törədilməsində Ermənistan Silahlı Qüvvələrinin (SQ) məsuliyyət daşıdığını bildirib.
Trend-in bazar ertəsi Azərbaycanın Diasporla İş üzrə Dövlət Komitəsinin mətbuat xidmətinə istinadən verdiyi məlumata görə, şəhər meri Nahed K.Nenşinin imzaladığı məktubda deyilir:
"1992-ci il fevralın 25-dən 26-na keçən gecə Ermənistan Silahlı Qüvvələri Azərbaycanın Dağlıq Qarabağ bölgəsinin Xocalı şəhərini mühasirəyə almış və şəhərə basqın edərək buranı tərk edən mülki əhalini güllə-baran etmişdir".
Məktubda, həmçinin qeyd olunub ki, "Kalqari şəhəri 2012-ci il 25-26 fevral tarixlərini həmin faciəli günün 20-ci ildönümü kimi tanıyır və həmin hadisələr zamanı həlak olmuş, eləcə də yaxınlarını itirmiş insanları xatırlayır.
Şəhər merinin qərarı ilə bu il fevralın 25 və 26-da Kalqaridə Xocalı faciəsinin 20-ci ildönümü qeyd olunub.