Azərbaycan, Naxçıvan, 30 yanvar / Trend , müxbir E.Məmmədov/ Naxçıvan Muxtar Respublikasında ilin ilk ayında şəxsiyyət vəsiqəsi alanların sayı 50 faiz artıb. Bu barədə çərşənbə günü Trend ə Naxçıvan MR Daxili İşlər Nazirliyinin (DİN) Pasport Qeydiyyatı Şöbəsindən məlumat veriblər.
1991-ci ilin avqustunda Sovet İttifaqı dağıldıqdan sonra Azərbaycanda istifadə olunan sovet pasportları 2001-ci ildən dəyişilməyə başlanılıb. Ölkədə bütün vətəndaşların pasportları milliləşdirilib.
Məlumata görə, yanvar ayında Muxtar Respublikanın 500 vətəndaşına şəxsiyyət vəsiqəsi verilib. Ötən ilin dekabrında isə bu rəqəm 204 nəfər olub.
1988-ci ildə Ermənistanla Azərbaycan arasında münaqişə yarandıqdan sonra Naxçıvan MR blokada vəziyyətinə düşüb. Muxtar respublika ilə Azərbaycan arasında yalnız hava xətti mövcuddur. İranla razılaşmadan sonra ötən ilin sonlarında Naxçıvan-İran-Bakı avtomobil reysi açılıb.
Avtobus reysi açılandan sonra İran ərazisindən keçmək üçün isə Azərbaycan vətəndaşlarından şəxsiyyət vəsiqələri tələb olunduğundan, şəxsiyyət vəsiqələrinin alınması üçün müraciət edənlər artıb.
