Azərbaycan, Bakı, 06 fevral / Trend , müxbir S.Ağayeva/ Azərbaycan Avropa İttifaqı (Aİ) və Qara dəniz regionu ölkələrinin xarici işlər nazirlərinin fevralın 14-də Kiyevdə keçiriləcək görüşündə xarici işlər naziri müavini səviyyəsində təmsil olunacaq.
Azərbaycan XİN-dən verilən məlumata görə, Kiyevə Mahmud Məmmədquliyevin rəhbərliyi altında nümayəndə heyətinin yollanacağı gözlənilir.
Ukrayna XİN-in verdiyi məlumata görə, görüş zamanı Aİ ilə Qara dəniz regionu arasında nəqliyyat, energetika, ətraf mühitin mühafizəsi sahəsində geniş əhatəli layihələrin təşkil olunması, həmçinin regionda təhlükəsizlik və stabilliyin möhkəmləndirilməsinə yönəldilmiş tədbirlərin həyta keçirilməsi məqsədi ilə əməkdaşlığın gələcək inkişafının müzakirə olunacağı gözlənilir.
Bu görüşdə Aİ və QİƏT ölkələrinin 16 xarici işlər naziri, o cümlədən Aİ-nin beynəlxalq münasibətlər və Avropa qonşuluq siyasəti məsələləri üzrə komissarı Benita Ferrero-Valdner, beynəlxalq maliyyə institutlarının nümayəndələri artıq öz iştiraklarını təsdiq ediblər.
Görüşün açılış mərasimində Ukrayna prezidenti Viktor Yuşenkonun iştirak edəcəyi planlaşdırılır.