Azərbaycan, Bakı, 11 fevral / Trend müxbir İ.Əlizadə/ Azərbaycan və Ermənistan deputatları aprel ayında Londonda görüşəcəklər. "Azərbaycan tərəfi bu görüşdə iştirak etməyə razılıq verib. Görüşdə Dağlıq Qarabağ münaqişəsinin həlli məsələsi müzakirə olunacaq" - deyə bazar ertəsi jurnalistlərə açıqlamasında Azərbaycan Parlamenti sədrinin birinci müavini, Təhlükəsizlik və müdafiə məsələləri daimi komissiyasının sədri Ziyafət Əsgərov bildirib.
AŞPA-nın Dağlıq Qarabağ üzrə Alt Komitəsinin sədri, böyük britaniyalı deputat Lord Rassel Conston ötən həftə Azərbaycana və Ermənistana səfər edib. Alt Komitənin sədri aprel ayında iki ölkəni təmsil edən deputatların iştirakı ilə Strasburqda konfransın keçirilməsi məsələsini müzakirə edib.
Əsgərov qeyd edib ki, konfrans Strasburqda deyil, Londonda keçiriləcək. Vitse-spiker bildirib ki, Azərbaycan və Ermənistan deputatlarının görüşməsi iki ölkə arasında əlaqənin qurulması kimi qiymətləndirilməməlidir.
Ermənistan Azərbaycan ərazisinin 20 faizini - Dağlıq Qarabağı və ətrafındakı yeddi rayonu işğal edib. İşğal 1988-ci ildən başlayıb, 1991-ci ilin dekabrınadək Şuşa və Xocalı istisna olmaqla Dağlıq Qarabağ Azərbaycanın nəzarətindən çıxıb. 1992-93-cü illərdə isə Şuşa, Xocalı və Dağlıq Qarabağın ətrafındakı daha yeddi rayon işğal edilib. 1994-cü ildə Ermənistanla Azərbaycan arasında atəşkəs haqqında razılıq əldə olunub və indiyədək də tərəflər arasında sülh danışıqları davam etdirilir.
Dağlıq Qarabağ münaqişəsinin sülh yolu ilə tənzimlənməsi üçün üç ölkə - ABŞ, Rusiya və Fransa təmsilçilərinin həmsədrliyi ilə ATƏT-in Minsk qrupu vasitəçilik edir.
AŞPA 2005-ci ilin yanvarında Dağlıq Qarabağ münaqişəsi ilə bağlı 1416 saylı qətnamə qəbul edib. Qətnamədə Ermənistanın Azərbaycan ərazilərini işğal etdiyi qeyd olunub və münaqişənin həlli ilə bağlı təkliflər əks olunub. AŞPA-da sənədin həyata keçirilməsinə nəzarət etmək üçün Alt Komitə yaradılıb.
Müəlliflə əlaqə saxlamaq üçün elektron ünvan - [email protected]
