Azərbaycan, Bakı, 29 fevral / Trend , müxbir Q.Cəbiyev/ Azərbaycanın hakim Yeni Azərbaycan Partiyası (YAP) iqtidaryönlü partiyaların Məşvərət Məclisinin aktiv fəaliyyətinə dair layihə hazırlayıb. Bu barədə cümə günü Trend "a YAP-ın icra katibinin müavini Siyavuş Novruzov məlumat verib.
Fevralın 28-də iqtidaryönlü partiyaların təmsil olunduğu Məşvərət Məclisinin iclası keçirilib. Nizamnamədə təsbit olunmuş rotasiyaya uyğun olaraq Məşvərət Məclisinə sədrlik YAP-a keçib.
2003-cü il prezident seçkisində iqtidarın namizədi olan Heydər Əliyevin seçki kampaniyası ərəfəsində yaradılan Məşvərət Məclisində Yeni Azərbaycan, Ana Vətən, Sosial Rifah, Demokratik Maarifçilik, Respublikaçılar, Demokratik Azərbaycan Dünyası, Milli Dövlətçilik və Azərbaycan Naminə Alyans partiyaları təmsil olunur. Məclisə DADP sədri Məmməd Əlizadə rəhbərlik edirdi.
Novruzov deyib ki, layihədə Məşvərət Məclisinin prezident seçkisi qabağı dəstəklədiyi namizədin seçki kampaniyasının aparılması, birgə aksiyaların keçirilməsi daxildir. Onun sözlərinə görə, qurumun fəaliyyətini gücləndirmək üçün məclisdə təmsil olunan partiyaların potensialından istifadə olunacaq.
Azərbaycanda prezident seçkisi oktyabrda keçiriləcək. YAP seçkidə partiyanın sədri, indiki prezident İlham Əliyevin namizədliyini irəli sürəcəyini açıqlayıb.
Məşvərət Məclisinə YAP-dan öncə sədrlik etmiş DADP sədri cümə günü Trend "a yeni sədrlik dövründə qurumun uğurlu fəaliyyət göstərəcəyinə ümid etdiyini deyib.
