Azərbaycan, Bakı, 29 fevral / Trend , müxbir K.Ramazanova/ BMT və ATƏT Kosovo ilə bağlı vəziyyətin unikal olduğunu və bu həll variantının digər münaqişələr üçün qəbuledilməz olduğunu hesab edir.
"Kosovo - beynəlxaq anlamda unikal bir hadisədir və presedent ola bilməz" - deyə cümə günü Trend a Kosovodan elektron poçt ilə BMT Baş Katibliyinin Kosovodakı xüsusi nümayəndəsi Coaxim Ruker bildirib.
Kosovo fevralın 17-də Serbiyanın tərkibindən birtərəfli qaydada çıxmasına dair bəyanat verib. Bu qərarı ABŞ və bəzi Avropa İttifaqı ölkələri tanıyıb. Rusiya Kosovonun birtərəfli qaydada müstəqil elan olunmasının beynəlxalq hüquq normalarına zidd olduğunu hesab edir. MDB ölkələrinin əksəriyyəti, o cümlədən SSRİ-nin dağılmasından sonra separatçı qüvvələr tərəfindən əraziləri işğal olunan Gürcüstan və Azərbaycan da bu mövqeyi dəstəkləyir.
"Kosovo ilə bağlı vəziyyət digər münaqişələr, o cümlədən Dağlıq Qarabağ münaqişəsi üçün presedent ola bilməz" - deyə Ruker bildirib.
ATƏT-in Kosovodakı missiyasının rəhbəri Tim Quildiman da hesab edir ki, Kosovo məsələsi unikal haldır və buna görə də ona "digər məsələlərdən ayrı baxmaq lazımdır".
"ATƏT missiyası bitərəf qalır və Kosovo məsələsinə dair heç bir mövqe bildirmir" - deyə cümə günü Kosovodan elektron poçt ilə Trend a Quildiman bildirib.
