Azərbaycan, Bakı, 06 mart / Trend , müxbir D.Xatınoğlu/ İranda fəhlələrin əmək haqlarının azlığı, gecikdirilməsi, fəhlə sindikatlarının rəhbərlərinin həbs olunması və aksiyaların qarşısının alınması dünya ictimaiyyətinin etirazına səbəb olub. "Beynalxalq səviyyədə, İran fəhlələrinin əmək haqlarının üçqat yoxsulluq səviyyəsindən aşağı olması və insan haqlarının pozulmasına dair kampaniyalar həyata keçiririk"-deyə, Londonda fəaliyyət göstərən "Kommunist-fəhlələr" partiyasının üzvü Məhəmməd Asəngəran Trend a bildirib.
Ümumdünya Nəqliyyat Federasiyası (İTF), Beynəlxalq Fəhlə Sindikatı Konfederasiyası (İTUC) və Beynəlxalq Birliklər Federasiyası 6 mart gününü "İran fəhlələrini müdafiə" günü adlandırıb. Bu gün dünyanın bir sıra ölkələrində İran diplomatları ilə sosial problemlərlə bağlı müzakirə keçiriləcək.
Hüquq müdafiəçisi Asəngəran cümə axşamı Londondan telefonla Trend a bildirib ki, dünyanın 15 ölkəsində Amnesty İnternational və digər təşkilatların iştirakı ilə İran fəhlələrini müdafiə aksiyası keçirilir. "İran hakimiyyəti fəhlələrə qanunsuz təzyiqlər göstərir. İranda fəhlə təşkilatlarının rəhbərləri həbsdədir, xüsusilə Nəqliyyatçılar Sindikatının sədri Mahmud Osanlu, Çorəkçilər Sindikatının sabiq sədri Mahmud Salihi və digərləri 5 illik həbsə məhkum olunub"deyə, Asəngəran bildirib.
İranlı hüquq müdafiəçisinin verdiyi məlumata əsasən, İranda yoxsulluq həddi rəsmi statistikada ayda 560$ göstərilib, digər tərəfdən, ölkədə minimum əmək haqqı190$ miqdarında müəyyən olunub. "Bəzi firma və idarələrdə fəhlələrin maaşı 4 aydan 1 ilədək gecikdirilib. Bu vəziyyətə etiraz edən11 fəhləyə Sənəndəc şəhərində şallaq cəzası verilib və digər şəhərlərdə də eyni ədalətsizliyi müşahidə etmək olar"-deyə, Asəngəran bildirib.
