Azərbaycan, Bakı, 11 mart/ Trend , müxbir İ.Əlizadə/ Azərbaycanın dinitəmayüllü (islamyönlü) siyasi partiyaları prezident seçkisində blok formasında və vahid namizədlə iştirak etmək üçün danışıqlar aparırlar. "Hazırda bir necə islamtəmayüllü partiya prezident seçkilərində blok formasında iştirak etməklə bağlı müzakirə aparırlar" - deyə çərşənbə axşamı Trend a açıqlamasında Azərbaycan İslam Partiyasının (AİP) mətbuat katibi Akif Heydərli bildirib.
Azərbaycanda bir neçə dinitəmayüllü siyasi partiya fəaliyyət göstərir. Onlardan ən tanınmışı İslam Partiyasıdır. 90-cı ilin əvvəllərində yaradılan partiya 1992-ci ildə dövlət qeydiyyatına alınıb. 1995-ci ildə partiyanın rəhbərliyi vətənə xəyanətdə ittiham edilərək həbs olunub və təşkilatın dövlət qeydiyyatı ləğv olunub.
Heydərli bildirib ki, əvvələki seçkilərdə islamyönlü partiyalar seçkilərdə blok şəklində iştirak ediblər: "Hazırda Azərbaycançı Qüvvələr Birliyində İslam Partiyası ilə yanaşı islamyönlü Birlik və Dirçəliş partiyaları da təmsil olunurlar. Fəzilət Partiyası ilə də prezident seçkilərində blok formasında iştirak etməklə bağlı danışıqlar aparılır".
Partiya rəsmisi əlavə edib ki, hələlik müzakirələr başa çatmayıb və hər hansı qərar qəbul olunmayıb: "Son qərarı partiyaların seçkili orqanları qəbul edəcək".