Azərbaycan, Bakı, 12 mart / Trend , müxbir S.İlhamqızı/ Açıq Cəmiyyət Partiyası bu vaxta qədər apardığı siyasətdən imtina edir və yeni siyasi kurs qəbul etməyə hazırlaşır. Bu barədə Trend ə partiyanın sədri Akif Şahbazov açıqlama verib.
Onun sözlərinə görə, partiyanın yeni siyasi kursu hakimiyyətə münasibətdə radikallıqdan uzaq olacaq, əvvəlki mübarizə metodlarından imtina edəcək. Lakin Şahbazov yeni siyasi kursun təfərrüatları barədə açıqlama verməyib.
"Bu vaxta qədər yürütdüyümüz siyasətin effekti olmadığına görə tamam yeni müstəvidə fəaliyyət göstərməyi düşünürük. Bizim siyasətdə yeni, maraqlı gedişlərimiz olacaq və bu yeniliklər bütövlükdə müxalifətə uğur gətirəcək. Hazırda bu kursun konsepsiyası hazırlanır"-deyə Şahbazov bildirib.
Onun sözlərinə görə, yeni konsepsiya partiyanın lideri Rəsul Quliyev tərəfindən qəbul edilərsə, Ali Məclisin növbəti toplantısında qəbul edilə bilər. Şahbazov əlavə edib ki, ACP yeni taktikanı seçdikdən sonra da hakimiyyətə müxalif mövqeyində qalacaq.
ACP liderinin müşaviri Zəminə Dünyamalıyeva da Trend ə açıqlamasında bildirib ki, müxalifətin radikal siyasətdən imtina etməsinin tərəfdarıdır və 2003-cü il prezident seçkisindən sonra, hələ ADP-də təmsil olunarkən bu təşəbbüsü irəli sürüb.
Müxalifətçi Azərbaycan Demokrat Partiyası 2007-ci ilin yanvarında hakimiyyətlə dialoq qurulması ilə bağlı yeni siyasi kursu qəbul edib. Buna etiraz olaraq ADP-nin sədri Quliyev və tərəfdarları partiyadan imtina edərək özlərinin Açıq Cəmiyyət Pariyasını yaradıblar.
Azərbaycanın eks-spikeri Quliyev 1996-cı ildən ABŞ-da mühacirətdə yaşayır.
