Azərbaycan, Bakı, 18 mart / Trend , müxbir S.İlhamqızı/ Beş müxalifət partiyasının təmsil olunduğu məşvərət qurumu Azərbaycan hökumətinin istefaya getməsini tələb edir.
Bu barədə Trend ə Azərbaycan Demokrat Partiyasının sədri Sərdar Cəlaloğlu açıqlama verib.
Məşvərət qurumunun çərşənbə axşamı keçirilən toplantısında birgə bəyanat qəbul olunub, Sənəddə bildirilir ki, ölkədə iqtisadi vəziyyət getdikcə ağırlaşır, bahalaşma durmadan davam edir, əhali kasıblaşır. "Beşlər" hesab edir ki, hökumətin fəaliyyəti ölkəni iflasa aparır və hökumət bu vəziyyəti dəyişməyə qadir deyil. Ona görə Məşvərət qurumu təklif edir ki, Azərbaycan prezidenti hökuməti istefaya göndərməli və Nazirlər Kabinetini yenidən formalaşdırmalıdır.
"Biz hesab edirik ki, hökumət bacarıqlı, iqtisadiyyatı mükəmməl bilən, gənc, perspektivli kadrlardan formalaşdırılmalıdır"-deyə Cəlaloğlu bildirib.
"Beşlər" həmçinin, bildiriblər ki, ABŞ Dövlət Departamentinin Azərbaycanda demokratiya və insan haqlarının durumuna dair son hesabatı obyektivliyi əks etdirir.
Məşvərət qurumu BMT-də Azərbaycanın işğal olunmuş ərazilərindəki vəziyyətlə bağlı Qətnaməyə Minsk Qrupunda həmsədr olan dövlətlərin əleyhinə səs verməsini də pisləyib.
Məşvərət qurumunda Azərbaycan Naminə İctimai Forum, ADP, Tərəqqi, AMİP və Müsavat partiyaları təmsil olunur.