Rusiya, Moskva, 20 mart / Trend , müxbir R.Ağayev/ Rusiyalı politoloq Qriqori Trofimçuk hesab edir ki, ABŞ Azərbaycanda Qəbələ radiolakasiya sistemindən (RLS) istifadə ideyasına yalnız onun məlumatlarından şəxsən özü istifadə etmək niyyəti ilə baxacaq.
Çərşənbə axşamı Moskvada Rusiya və ABŞ xarici işlər və müdafiə nazirlərinin "iki üstəgəl iki" formatında ikigünlük məsləhətləşmələri keçirilib. Məsləhətləşmələrdə ABŞ-ın dövlət katibi Kondaliza Rays və Pentaqon rəhbəri Robert Qeyts iştirak edib. Ekspertlərin rəyinə görə, məsələhətləşmələrdə danışıq mövzularından biri Rusiyanın Azərbaycandan icarəyə götürdüyü Qəbələ RLS-dən birgə istifadə məsələsi olub.
"ABŞ özü bu materialı mənimsəyəcəyi təqdirdə Qəbələ RLS-dən istifadə ideyasına baxacaq. Rusiyanın sıxışdırılıb çıxarılması hətta 2012-ci ildən tez baş tutacaq. Çünki hadisələr olduqca sürətlə inkişaf edir, özü də Rusiyanın əlyhinə" - deyə Trend a çərşənbə günü Strateji Modelləşdirmə Mərkəzinin vitse-prezidenti, Rusiya Federasıyası Dövlət Dumasının Müdafiə Komitəsinin müşaviri Qriqori Trofimçuk bildirib.
Politoloq sübut kimi bu mövzu ilə əlaqədar Moskvada Amerika-Rusiya məsləhətləşmələrinin keçirildiyi dövrdə Şərqi Avropada konkret RƏM sistemlərinin yerləşdirilməsi üzrə Birləşmiş Ştatların fəaliyyətini göstərib. "Bu, danışıqlar və məsləhətləşmələrin mənasız olduğunu göstərir" - deyə Trofimçuk vurğulayıb.
Onun fikrincə Putinin Azərbaycandakı Qəbələ RLS-nin birgə istifadəyə dair təklifi amerikalılar üçün aktual və maraqlı olaraq qalır. "Prinsip etibari ilə bu istiqamətdə istənilən müsbət hərəkətlər aktualdır. Lakin vəziyyəti Rusiya tərəfindən son dərəcə qeyri-standart təkliflər xilas edə bilər. Bunlar hətta təklif deyil, əvvəllər olmayan adi və formatsız ideyalar ola bilər. Üzərində işləmək üçün hakimiyyətə təqdim olunacaq məhz bu kimi ideyaların daşıyıcıları olan yeni insanların - politoloq, ekspert, analitik və digər şəxslərin ortaya çıxmasını gözləmək lazımdır" - deyə Strateji Modelləşdirmə Mərkəzinin vitse-prezidenti qeyd edib.
Trofimçukun qənaətinə görə, Moskvada keçirilən Rusiya-Amerika məsləhətləşmələri "danışıqlar naminə danışıqlar" və ictimaiyyətin sakitləşdirilməsi üçün idi. "Biz bir müddət öncəki İkinci Dünya Müharibəsi təcrübəsinə malik olaraq çox yaxşı başa düşürük ki, qlobal münaqişənin başlanğıcı məhz belə olur. Bizim bu gün müşahidə etdiyimiz demək olar ki, dəqiqliyi ilə ikinci Dünya Müharibəsi ərəfəsində baş vermişdi" - deyə o bildirib. "Mən bunun eyni sseneri üzrə inkişf etməsini istəməzdim, lakin tarix göstərir ki, hər şey təxminən eyni məntiq üzrə inkişaf edir. "O zaman Qərb məhz bu vasitə ilə SSSR-ni sakitləşdirmişdi və inandırmışdı ki, SSSR-nin sərhədlərində qoşunların hərəkəti, texnikanın gücləndirilməsi Sovet İttifaqına hücum üçün deyil" - deyə rusiyalı politoloq bildirib.
Ötən ilin ilin iyununda Rusiya Federasiyasının prezidenti ABŞ-a Azərbaycandakı Qəbələ RLS-dən və Rusiyanın Armavir şəhərində hazırda tikilən RLS-dən birgə istifadə və informasiya əldə etməyi təklif edib. Bu təklif ABŞ-ın Polşa və Çexiyada RƏM elementlərinin yerləşdirilməsindən imtina etməsi şərti ilə edilib. ABŞ Rusiyanın təklifindən imtina etdi və Şərqi Avropada planlarını həyta keçirmək niyyətində olduğunu bəyan etdi. Həmçinin ABŞ Avropada RƏM yerləşdirilməsi ilə yanaşı Qəbələ RLS-dən birgə istifadə məsələsinə baxmağa da hazır olduğunu ifadə edib.