Azərbaycan, Bakı, 29 mart / Trend , müxbir S.Ağayeva/ Azərbaycan ilə Küveyt arasında əməkdaşlığın inkişafı üzrə ikitərəfli sənədlər paketi hazırlanır. Sənədlərin Azərbaycan prezidenti İlham Əliyevin aprelin əvvəllərində Küveytə rəsmi səfəri zamanı imzalanması planlaşdırılır.
Danışıqlar masasında əməkdaşlığın ticari-iqtisadi və humanitar sahələrini əhatə edən təxminən 20 sənəd var. Lakin onlardan neçəsinin imzalanacağı hələ razılaşdırılmayıb. Bu barədə Trend a şənbə günü telefonla Əl-Küveytdən Azərbaycanın Küveytdəki səfiri Şahin Abdullayev məlumat verib.
Bu günlərdə hər iki ölkənin ekspertləri Əl-Küveytdə sənəd layihələrini nəzərdən keçirəcəklər. Səfir bildirib ki, sənədlər paketinə iqtisadiyyat, mədəniyyət, turizm və digər sahələrdə əməkdaşlıq üzrə ikitərəfli saziş layihələri daxildir.
Dövlət başçısının Küveytə səfəri zamanı bu ölkə rəhbərliyi ilə görüşlər keçirilməsi gözlənilir. Görüşlər zamanı gələcəkdə ikitərəfli əlaqələrin möhkəmləndirilməsi, İslam Konfransı Təşkilatı (İKT) çərçivəsində əməkdaşlığın genişləndirilməsi məsələləri üzrə təcrübə mübadiləsi aparılacaq, Dağlıq Qarabağ münaqişəsinin nizamlanması ətrafında vəziyyət müzakirə olunacaq.