Azərbaycan, Bakı, 31 mart / Trend , müxbir S.İlhamqızı/ Demokratik Seçki Mərkəzində təmsil olunan partiyalar bu ilin oktyabrında Azərbaycanda keçiriləcək prezident seçkisində vahid namizədlə iştirak etmək barədə müzakirələr aparırlar.
"Çalışacağıq ki, milli demokratik qüvvələrin seçkidə vahid namizədlə iştirakına nail olaq"-deyə Bütöv Azərbaycan Xalq Cəbhəsi Partiyasının sədri Qüdrət Həsənquliyev Trend a açıqlamasında bildirib.
Demokratik Seçki Mərkəzi adlı qurumda müxalifətçi Klassik Xalq Cəbhəsi, Azadlıq, Milli Demokrat, Yaşıllar, Təkamül, Açıq Cəmiyyət, Böyük Azərbaycan, BAXCP, Böyük Quruluş partiyaları təmsil olunur.
Həsənquliyev bildirib ki, DSM-də təmsil olunan bir sıra partiyalarla ayrı-ayrılıqda vahid namizəd məsələsi ilə bağlı müzakirələr aparıb. Onun sözlərinə görə, bu danışıqlar davam etdiriləcək və DSM çərçivəsində ən şanslı namizədin müəyyənləşməsi mümkündür.
Həsənquliyev əlavə edib ki, BAXCP-nin prezident seçkisində iqtidarın namizədini dəstəkləməsi də mümkündür: "Bu, iqtidarın seçkidə hansı konsepsiya, proqram və platforma ilə iştirak etməsindən, həmçinin siyasi partiyalarla münasibətindən asılı olacaq. Hesab edirik ki, iqtidar seçki ilə əlaqədar müxalifət partiyaları ilə müzakirələr aparmalıdır"-deyə Həsənquliyev bildirib.
BAXCP özünü iqtidara qarşı konstruktiv müxalifət hesab edir. Partiyanın sədri Həsənquliyev Milli Məclisin deputatıdır.
