Azərbaycan, Bakı, 05 aprel / Trend , müxbir D.Xatınoğlu/ Rəsmi Kabil Əfqanıstanda yerləşən beynəlxalq antiterror koalisiyası qüvvələrinin tərkibində müsəlman ölkələrini təmsil edən hərbçilərin çoxluq təşkil etməsini daha effektiv hesab edir. "Əfqanıstanda islam ölkələri hərbi qüvvələrinin yardımı daha effektivdir" - deyə Əfqanıstan XİN-in mətbuat katibi Şəfiullah Xavəri Trend a bildirib.
Aprelin 4-də Buxarestdə keçirilən NATO sammitində Əfqanıstandakı xarici sülhməramlıların sayının əlavə olaraq təxminən 2000 hərbçi artırılması barədə qərar qəbul olunub. "Associated Press"in məlumata əsasən, NATO 2010-cü ilədək ölkədə 80 min əfqan hərbçinin hazırlanması və xarici koalisiya qüvvələrinin onlarla əvəzlənməsini planlaşdırır.
"Yerli əhali xarici müsəlman sülhməramlılara daha səmimi yanaşır və daha çox inanır, o cümlədən, Azərbaycan və ərəb ölkələrindən olan hərbçilərə" - deyə şənbə günü Xavəri Kabildən telefonla bildirib. "Bu qüvvələr Əfqanıstanın mədəniyyətini, adət və ənənələrini daha dərindən başa düşür, bu səbəbdən də müsəlman hərbçilərinin sayının artırılması daha məqsədəuyğundur" - mətbuat katibi əlavə edib.
"Əfqanıstanda yerli qüvvələrlə bərabər xarici qüvvələrin də terrorçuluqla mübarizədə böyük zəhməti var. NATO qüvvələri böyük əməliyyatlar keçirib, eyni zamanda, imkan daxilində əfqan qüvvələrinə hərbi təlimlər keçiblər. Lakin təəssüf ki, müsəlman ölkələrinin hərbi qüvvələrinin ölkəyə yardımı daha az səviyyədədir" - deyə Xavəri bildirib.
Xavəri hesab edir ki, əfqan hərbçiləri Taliban hakimiyyəti devrildikdən sonra zəifləsə də, hazırda getdikcə güclənir və iki il ərzində hazırlanacaq yerli qüvvələr ölkənin sabitliyini qorumaq üçün yetərincə gücə malik olacaqlar.
Aprelin 4-də başa çatan NATO sammitində Fransa 700, Gürcüstan 500, Polşa 400 hərbçi və 8 vertolyot, Çexiya 120, Azərbaycan 45 və Yeni Zelandiya 18 hərbçi göndərəcəyini təklif edib. Hazırda NATO-ya üzv-ölkələrin hamısından (26 ölkə) cəlb olunmuş 47 min həbçi Əfqanıstanda fəaliyyət göstərir.
Azərbaycanın Əfqanıstandakı sülhməramlılarının sayı isə hazırda 45 nəfər təşkil edir.
