Azərbaycan, Bakı, 08 aprel / Trend , müxbir S.İlhamqızı/ Ümid Partiyasının sədri, millət vəkili İqbal Ağazadənin bu ilin oktyabrında keçiriləcək prezident seçkisində namizəd olacağına dair Lənkəran şəhərində məlumat vərəqələri yayılıb. Bu barədə Trend un Lənkəran üzrə müxbiri məlumat verir.
Vərəqələr küçələrdə əhaliyə paylanılır. Vərəqələrdə Ağazadə özünü tanıdır, namizəd olacağı barədə məlumat verir.
Seçki Məcəlləsinin 75.2-ci maddəsinə əsasən, seçkidə iştirak edən namizədlərin təşviqatı səsverməyə 60 gün qalmış başlayır, 24 saat qalmış başa çatır. Builki prezident seçkisi oktyabrın 15-nə təsadüf edir və təşviqat kampaniyası da avqustun 16-dan başlamalıdır.
Ağazadə Trend a açıqlamasında bildirib ki, özü barədə məlumat vərəqələrinin paylanması qanun pozuntusu deyil. Çünki paylanılan materiallar yalnız tanıtım vərəqələridir: "Bu vərəqələr qətiyyən təbliğat materialı deyil. Biz bununla seçkiyə çağırış etmirik, əhalini Ümid Partiyasının namizədinə səs verməyə çağırmırıq. Vətəndaşın prezidentliyə namizəd olacağı barədə məlumat verməsi, özünü tanıtması heç bir qanunla qadağan deyil"-deyə Ağazadə bildirib.
MSK-dan isə bildirilib ki, əgər vətəndaş seçkidə namizəd olacağını elan edirsə, bu, qanun pozuntusı deyil. Yox əgər namizəd kimi çıxış edirsə, təbliğat xaraktreli çağırışlar edirsə, qanun pozuntusudur.
Müəlliflə əlaqə saxlamaq üçün elektron ünvan - [email protected]