Azərbaycan, Gəncə, 16 aprel / Trend , müxbr V.Məmmədov/ Gəncə şəhər Polis İdarəsinin əməkdaşları 17 aprel Beynəlxalq hemofoliyalı xəstələr günü münasibəti ilə bu gündən qanvermə aksiyasına başlayıblar. Aksiyada idarənin 1000-ə yaxın polis əməkdaşı iştirak edəcək.
Gəncə şəhər Polis İdarəsinin rəisi Rasim Musayev çərşənbə günü jurnalistlərə bildirib ki, idarənin şəxsi heyəti iki gün müddətində növbə ilə qanvermə aksiyasına qatılacaq.
Gəncə şəhər Səhiyyə İdarəsinin rəisi Mehman Rzayevin verdiyi məlumata görə, hazırda qərb bölgəsində 67 nəfər irsi qan xəstəliyindən əziyyət çəkir. Onlardan 30-u hemofiliyalı (qanın laxtalanmaması xəstəliyi), 37-si talesemiyalı (qanyaradıcı orqanların qan yaratmaması) xəstələrdir. Xəstəlikdən əziyyət çəkənlərin 80 faizinin azyaşlı uşaqlar olduğunu qeyd edən Rzayev ötən il talasemiya xəstəliyindən bir nəfərin dünyasını dəyişdiyini, bu il isə bir talesemiya və bir hemofiliyalı xəstənin qeydiyyata alındığını bildirib.
Rzayevin bildirdiynə görə, 120 nəfər donordan yığılan qan ehtiyatı ilə 67 nəfər irsi qan xəstəsini bir ay yaşatmaq mümkün olur.
Gəncə paytaxt Bakıdan 365 kilometr qərbdə yerləşir.
Məqalə müəllifi ilə əlaqə ünvanı: [email protected]