Azərbaycan, Bakı, 16 aprel / Trend , müxbir S.İlhamqızı/ "Azad və Ədalətli Seçkilər Uğrunda" Əlaqələndirici Məşvərət Şurası bu ilin oktyabrında Azərbaycanda keçiriləcək prezident seçkisində səslərin paralel sayılması, "exit-poll" və seçkinin müşahidəsini həyata keçirəcək.
"Prezident seçkisində kompleks tədbirlər keçirməyi planlaşdırırıq"-deyə Məşvərət Şurasının koordinatoru Arzu Abdullayeva çərşənbə günü Trend a açıqlamasında bildirib.
Onun sözlərinə görə, Şura 125 seçki dairəsinin hamısında və bir sıra seçki məntəqələrində seçkinin müşahidəsini aparacaq. Eyni vaxtda səslərin paralel sayılmasını və "exit-poll" təşkil edəcək, həmçinin bütün namizədlərlə, onların seçki qərargahları ilə mütəmadi əlaqə quracaq, seçki ilə bağlı "qaynar xətt" yaradacaq.
Abdullayeva bildirib ki, bu tədbirlərə dəstək verilməsi ilə əlaqədar ABŞ-ın, Böyük Britaniyanın, ATƏT-in, Avropa Şurasının Azərbaycandakı səfirlikləri ilə danışıqlar aparılır.
Abdullayevanın sözlərinə görə, Əlaqələndirici Məşvərət Şurası seçkidə kompleks tədbirlərə görə hələlik maliyyə dəstəyi almayıb.
1998-ci ildən bəri seçkilərin monitorinqini aparan "Vətəndaş Cəmiyyəti Uğrunda" QHT də builki prezident seçkisində müşahidə aparacaq, lakin "exit-poll" təşkil etməyəcək. "Çünki "exit-poll" mürəkkəb və maliyyə vəsaiti aparan bir prosesdir, bizim isə buna maliyyə imkanlarımız yoxdur. Həm də Azərbaycanda bu təcrübə özünü doğrultmadı, ona görə də hesab edirik ki, "exit-poll"a ehtiyac yoxdur, sadə monitorinq isə seçki barədə tam, aydın təsüvvür yaradır"-deyə həmin QHT-nin rəhbəri Eldar İsmayılov Trend a açıqlamasında bildirib.
Onun sözlərinə görə, "Vətəndaş Cəmiyyəti Uğrunda" QHT seçki məntəqələrinin ən azı 30 faizində müşahidələr aparacaq.
Müəlliflə əlaqə saxlamaq üçün elektron ünvan - [email protected]
