Azərbaycan, Bakı, 21 aprel / Trend , müxbir Q.Cəbiyev/Azərbaycanın müxalif Milli İstiqlal Partiyasının (AMİP) Bakı Şəhər İcra Hakimiyyətinə qarşı kassasiya şikayəti icraata götürülüb. Bu barədə bazar ertəsi Trend -a AMİP-in sədr müavini Əli Orucov məlumat verib.
AMİP 2 ay bundan öncə Bakı meriyasını məhkəməyə verib. Partiyanın iddiasına görə, meriya qanuna zidd olaraq partiyanın sərbəst toplaşmaq hüququnu məhdudlaşdırır. İddiaya ilk olaraq Səbail rayon məhkəməsində baxılmışdı və AMİP-in iddiası təmin olunmamışdı. Sonradan Apellyasiya Məhkəməsi də ilkin instansiya məhkəməsinin qərarını qüvvədə saxlamışdı. Partiya yenidən Ali Məhkəməyə kassasiya şikayəti vermişdi.
Orucov bildirib ki, kassasiya şikayətinə aprelin 25-də baxılacaq.
AMİP 1992-ci ildə yaradılan və Azərbaycanda ilk dövlət qeydiyyatına alınan partiyadır. Müxalifəti təmsil edən AMİP-in qurucusu və 2004-cü ilin sonunadək sədri olan Etibar Məmmədov hazırda Beynəlxalq Demokrat İttifaqının (BDİ) sədr müavinidir.
Məqalə müəllifi ilə əlaqə ünvanı: [email protected]
