Azərbaycan, Bakı, 24 aprel / Trend , müxbir S.İlhamqızı/ Mədəniyyət və Turizm Nazirliyi Azərbaycan Milli İstiqlal Partiyasının qurultayına yer ayrılması ilə bağlı müraciətinə cavab verib. Bu barədə Trend a AMİP-dən məlumat verilib.
AMİP aprelin 20-nə təyin etdiyi qurultayının Rəşid Behbudov adına Mahnı Teatrında keçirilməsinə icazə verilməsi üçün Mədəniyyə və Turizm Nazirliyinə müraciət etmişdi.
Cümə axşamı nazirlikdən AMİP-ə ünvanlanan cavab məktubunda bildirilir ki, aprelin 20-də Azərbaycan Dövlət Mahnı Teatrında Misir Ərəb Respublikasının mədəniyyət günlərinin açılışına həsr edilmiş tədbirlər keçiriləcək. Ona görə də həmin gün partiyanın orada tədbir keçirilməsi mümkün deyil.
AMİP-dən bildirilib ki, başqa tarix və başqa obyektlər təklif olunmaqla Mədəniyyət və Turizm Nazirliyinə təkrarən müraciət olunacaq.
Bundan əvvəl Milli Təhlükəsizlik Nazirliyi AMİP-in müraciətinə cavab vermiş, onun tabeliyində olan Şəhriyar adına Mədəniyyət Mərkəzində təmir işlərinin aparıldığını əsas gətirərək bu obyektdə partiyanın qurultay keçirməsinə razılıq verməmişdi.
Müəlliflə əlaqə saxlamaq üçün elektron ünvan - [email protected]