Azərbaycan, Bakı,13 may / Trend , müxbir K.Zərbalıyeva/ Hüquqşünas Ənnağı Hacıbəyli Konstitusiya Məhkəməsinin onun şikayətini icraata götürməkdən qanunsuz imtinası ilə bağlı Avropa Məhkəməsinə şikayət verib.
Hacıbəylinin hüquqlarını müdafiə edən İntiqam Əliyev bildirib ki, Konstitusiya Məhkəməsi Hacıbəylinin Vəkillər Kollegiyasına üzvlükdən qanunsuz imtina ilə bağlı şikayətinə ölkə məhkəmələrində baxılması zamanı hüquq və azadlıqlarının pozuntusu ilə bağlı ünvanladığı şikayəti icraata qəbul etməkdən imtina edib.
2006-cı ilin noyabr ayından başlayaraq lisenziyalı hüquqşünasların Vəkillər Kollegiyasına üzvlüyünün rəsmiləşdirilməsinə başlanıb. "Vəkillər və vəkillik fəaliyyəti haqqında" Qanuna edilən 3 iyun 2005-ci il tarixli dəyişikliyə əsasən, lisenziya almış bütün şəxslər ixtisas imtahanı vermədən Vəkillər Kollegiyasının üzvlüyünə qəbul olunmalıydı.
Lakin VK-nın Rəyasət Heyətinin 2006-cı ilin yanvarın 26-da keçirilən iclasında Hacıbəyliyə rədd cavabı verilib.Hüquqşünas VK-nın özbaşınalığından məhkəməyə şikayət versə də, şikayəti rədd edilib.
Konstitusiya Məhkəməsi də Hacıbəylinin şikayətini qəbul etməkdən imtina edib.
Ərizəçi bunu həm Azərbaycan qanunvericiliyinin, həm də Konvensiyanın 6-cı maddəsi ilə təminat verilən məhkəməyə çatımlıq hüququnun pozuntusu kimi qiymətləndirərək Azərbaycana qarşı Strasburq Məhkəməsində ikinci iş qaldırıb. Bu ilin yanvarında vəkilliyə qəbuldan imtina ilə bağlı Hacıbəylinin Azərbaycana qarşı ilk şikayəti Avropa İnsan Hüquqları Məhkəməsinə göndərilib. Şikayətdə Konvensiyanın 6-cı (ədalətli məhkəmə araşdırması hüququ), 10-cu (fikri ifadə etmək azadlığı), 11-ci (birləşmək hüququ), 14-cü (ayrı-seçkiliyə məruz qalmamaq hüququ) və digər maddələrin pozuntusu qaldırılır.
Müəlliflə əlaqə saxlamaq üçün elektron ünvan - [email protected]