Azərbaycan, Bakı, 21 may / Trend , müxbir D.Xatınoğlu/ İran rəsmilərinin son bir həftə ərzində, ölkədə terror aktları ilə əlaqədar həbs olunanların ABŞ, Britaniya və İsrail tərəfindən dəstəklənməsini iddia etməsi şübhəlidir. "Rəsmi Tehranın İsrail, Britaniya və ABŞ-ı İranda terror törətməkdə ittiham etməsi, Qərbin bu ölkəyə ittihamlarına qarşılıqlı cavabdır" - deyə, Vaşinqtondakı İran Tədqiqat Mərkəzinin sədri Möhsün Sazegara (Mohsen Sazegara) Trend -a bildirib.
İRNA Agentliyi xəbər verib ki, İranın Təhlükəsizlik Orqanı "Ettelaat"ın mayın 20-də yaydığı bəyanata əsasən, " İranda fəaliyyət göstərən Amerikaya bağlı terror şəbəkəsi" zərərləşdirilib. Bundan əvvəl, Ədliyyə Nazirliyinin mətbuat katibi ölkədə təxribata səy göstən "ABŞ, Britaniya və İsrailə bağlı" 12 terrorçunun həbsi barədə məlumat vermişdi.
"İran rəsmiləri iki ay bundan əvvəl Şiraz şəhərində baş verən partlayışın terror aktı olmadığını bildirmişdilər. Bu qədər vaxt keçdikdən sonra partlayışı təxribatçı qüvvələrə bağlamaq, İranın iddialarının şübhəli olmasını göstərir" - deyə, Sazegara çərşənbə günü telefonla Vaşınqtondan bildirib. Onun sözlərinə görə, İran rəsmilərinin ikili fikirləri yalnız Şiraz şəhərindəki partlayışla bağlı deyil, həbs olunmuş terrorçular haqqında verdikləri məlumatda da görünür. İran rəsmiləri həbs olunmuş 12 terrorçunu bəzən Tehranın sabiq şah hakimiyyəti tərəfdarlarına, bəzən Britaniya, ABŞ və İsrailə bağlı olduqlarını bildirirlər. Lakin ortada heç bir tutarlı fakt və sübut yoxdur" - deyə, İran əsilli Amerika politoloqu Sazegara hesab edir.
Onun sözlərinə görə, yaxın gələcəkdə həbs olunmuş terrorçuların etiraflarının efirdə səsləndirilməsi gözlənilir. "Rəsmi Tehran müxtəlif vaxtlarda bəzi terrorçuların Qərbə bağlı lıqlarını etiraf etmələrini kanallar vasitəsilə yayıb, lakin sonra bunun əski sübut olunub" - deyə Sazegara bildirib.
İranın Şiraz şəhərində aprel ayının 11-də (Rəhpuyan-Vesal) məscidində baş vermiş partlayışda 12 nəfər həlak olub, 200 nəfər ağır xəsarət alıb. Bu hadisə ilə bağlı indiyədək 12 nəfər "terrorçuluq" ittihamı ilə həbs olunub. İran rəsmilərinin məlumatına əsasən, bu terror şəbəkəsinin Rusiya konsulluğu, bəzi mədəni mərkəzlər və izdihamın gur olduğu yerlərdə hazırladığı bir sıra terror aktları zərərsizləşdirilib.
