Azərbaycan, Bakı, 22 may / Trend , müxbir S.İlhamqızı/ Rəsmi Ankara Fransanın Avropa Birliyində sədrliyi dövründə, Türkiyənin bu təşkilata üzv olması prosesində irəliləyiş əldə olunmasını gözləyir. "Ümid edirik ki, Fransanın sədrliyi dövründə Türkiyənin AB-yə üzv olması prosesi problemsiz, normal şəraitdə gedəcək" - deyə Türkiyənin Xarici İşlər Nazirliyindən Trend -a bildirilib.
İyulun 1-dən Avropa Birliyində Fransanın sədrlik dövrü başlayır. Fransa Türkiyənin AB-yə üzvlüyünü təqdir etməyən ölkələrdən sayılır.
Türkiyənin xarici siyasət idarəsi Fransanın sədrliyi dövründə Türkiyəyə əngəl törətməyəcəyinə ümid edir : "Avropa Birliyinə üzv olmaq Türkiyə üçün strateji bir hədəfdir və bu hədəfə çatmaq üçün Türkiyə bir çox islahatlar həyata keçirir, siyasi, iqtisadi, mədəni sahələrdə ciddi addımlar atır. Fransanın sədrliyi dövründə Türkiyənin Avropa Birliyinə üzvlüyü prosesində irəliləyişlər əldə olunmasını gözləyirik" - deyə cümə axşamı Türkiyə XİN-dən yazılı şəkildə bildirilib.
Rəsmi Ankara hesab edir ki, Türkiyə ilə Fransa arasında bir çox sahələrdə ikitərfli əlaqələrin inkişaf etdirilməsi üçün potensial var.
Fransanın Avropa məsələləri ilə əlaqədar Dövlət Katibi Jean Pierre Jouyet mayın 6-da Ankarada Türkiyənin xarici işlər naziri Əli Babacanla birgə keçirdiyi mətbuat konfransında bildirib ki, ölkəsi Avropa Birliyində sədr kimi tərəfsiz, balanslı mövqe tutacaq. Onun sözlərinə görə, Fransa Türkiyə ilə Avropa Birliyi arasında müzakirələrə zərər vurmaq niyyəti yoxdur: "Fransa Türkiyənin həyata keçirdiyi islahatları müsbət qiymətləndirir, lakin hesab edirik ki, bu işlər təkcə Avropa Birliyinə üzv olmaqda deyil, həm də Türkiyənin özünə vacibdir. Türkiyənin Avropa Birliyinə üzvlüyü məsələsinə fərqli baxışlarımız var, amma biz bütün şərtlərin yerinə yetirilməsini arzu edirik" - deyə Fransa rəsmisi bildirib.
Məqalə müəllifi ilə əlaqə saxlamaq üçün elektron ünvan [email protected]
