Azərbaycan, Bakı, 30 may/ Trend , müxbir E.Babayev/ Azərbaycanın müxalif partiyaları və politoloqlar hesab edirlər ki, üç müxalifət partiyasının (Xalq Cəbhəsi, Vətəndaş və İnkişaf, Liberal) təmsil olunduğu "Azadlıq" blokunun boykot qərarı seçkinin gedişatına təsir etməyəcək. "Onsuz da cəmiyyətin əksər hissəsi apolitik vəziyyətdədir və siyasi həyatdan kənarlaşıb. Bu baxımdan boykot addımının vətəndaşların seçkidə iştirak edib-etməməsinə hər hansı təsiri mümkün deyil", - bunu cümə günü Trend -a ADP sədri Sərdar Cəlaloğlu deyib.
Trend -un arayışı: Mayın 29-da "Azadlıq" bloku boykot qərarını rəsmiləşdirib. Blok xüsusən Seçki Məcəlləsinə əlavə və dəyişikliklər zamanı seçki komissiyalarının paritet əsasda formalaşması təklifinin nəzər alınmamasına etiraz edib. Eyni zamanda, blok dəyişikliklər sırasında namizədlər üçün depozitin 300 min manata qaldırılmasının, dövlət KİV-də namizədlərə ayrılan pulsuz təbliğatın ləğv olunmasının, namizədlərin qeydiyyatının ləğvinin sadələşdirilməsinin müxalifətin imkanlarını məhdudlaşdırmağa xidmət etdiyi qənaətindədir.
Cəlaloğlu bildirib ki, blokun əsas gətirdiyi məsələləri haqlı saymaq olar. "Biz də hesab edirik ki, qeyri-bərabər şəraitdə seçkidə qalib gəlmək mümkün deyil. Ancaq mübarizədən kənara çəkilməyi doğru saymaq olmaz. Biz seçkilərə qatılmaqla ölkədəki mövcud problemlərin həllində irəliləyişin əldə olunmasına ümid edirik", - deyə Cəlaloğlu qeyd edib.
Müsavat Partiyasının Mərkəzi İcra Aparatının rəhbəri Arif Hacılı da hesab edir ki, seçkidə iştirak daha uğurlu mübarizə metodudur. "Mən blokun qərarını geniş şərh etmək istəməzdim. Ancaq bu qərarın seçkilərin gedişatına hər hansı təsirinin olmayacağı qənaətindəyəm. Azərbaycanda seçkilərin baş tutması üçün yetərsay yoxdur. Bu baxımdan boykot addımının seçici fəallığına təsiri barədə danışmaq yersizdir", - deyə Hacılı cümə günü Trend -a bildirib.
Azərbaycanın hakim Yeni Azərbaycan Partiyasının (YAP) İdarə Heyətinin üzvü Bahar Muradova isə Trend -a deyib ki, müxalifətin boykot addımı seçkinin baş tutmasına və prosesin gedişinə təsir göstərməyəcək. Onun fikrincə, müxalifət partiyaları və bloklarının Azərbaycanda baş verən ictimai-siyasi proseslərə güclü təsir göstərmək imkanları yoxdur .
Politoloq Rasim Musabəyov isə Trend -a bildirib ki, hakimiyyətlə mübarizənin yeganə yolu seçkidə iştirakdır. Onun sözlərinə görə, yalnız seçkidə iştirakla cəmiyyəti canlandırmaq, öz mövqeyini cəmiyyətə çatdırmaq və vəziyyəti dəyişməyə nail olmaq mümkündür. Musabəyov bildirib ki, Azərbaycanda mövcud qanunvericilik aktiv boykota imkan vermir. Seçki kampaniyası vaxtı vətəndaşlar seçkidə iştirak etməməyə çağırıla bilməz. Yəni hər hansı partiyanın boykot addımı seçkidə iştirak etməməkdən o tərəfə keçməyəcək.
Politoloq Zərdüşt Əlizadə isə bu qənaətdədir ki, Azərbaycan müxalifəti prezident seçkisini boykot etmək imkanında deyil. "Müxalifət daxilində kifayət qədər qondarma liderlər var və onlar seçkidə iştirak edərək boykot taktikasının əhəmiyyətini aşağı salacaqlar" - deyən Əlizadənin fikrincə, müxalifət daxilində seçkidə iştiraka münasibət fərqli olduğundan, boykot taktikasının əhəmiyyəti heçə enir. "Boykot taktikası mənasızdır. Seçkidə iştirak etmək lazımdır. Boykot o halda təsirli olur ki, hamı bu yolu tutur. Real müxalifət rəhbərlərinin strateji səhvi odur ki, seçkiarası dövrdə saxta müxalifətdən xilas ola bilməyiblər. Müxalifət liderləri arasında o qədər rəqabət var ki, istənilən adamla sazişə gedərək onları müxalifət statusuna mindirirlər. Buna görə də boykot taktikası alınan deyil", - politoloq Trend -a açıqlamasında əlavə edib.
Politoloq Hikmət Hacızadənin fikrincə isə, müxalifətin ümumi boykot qərarı qəbul etməsi effektiv ola bilər. "Boykot qərarı ilə bağlı müxalifətdə fikir ayrılığı var. Müxalifətin bir hissəsi seçkini teatr adlandırır və bu teatrda iştirak etməkdən imtina edir. Digər hissəsi isə seçki teatr olacağı təqdirdə də, seçkidən tribuna kimi istifadə edəcəyini bildirir", - politoloq qeyd edib.
Trend -un arayışı: Azərbaycanda prezident seçkisi oktyabrın 15-də keçiriləcək. İndiyə qədər Müsavat Partityasının başqanı İsa Qəmbərin, ADP sədri Sərdar Cəlaloğlunun, Yaşıllar Partiyasının sədri Mais Güləliyevin namizədliyi təmsil olunduqları partiyalar tərəfindən irəli sürülüb. Bundan başqa, Azərbaycan Naminə İctimai Forumun rəhbəri Eldar Namazov müstəqil şəkildə namizədliyini irəli sürüb. Hakim Yeni Azərbaycan Partiyası isə hazırki dövlət başçısı İlham Əliyevin namizədliyini irəli sürmək niyyətindədir.
Məqalə müəllifi ilə əlaqə ünvanı: [email protected]
