Azərbaycan, Bakı, 30 may / Trend , müxbir D.Xatınoğlu/ İran hakimiyyəti ölkədə bəhailərin kütləvi şəkildə həbs olunmasını "milli təhlükəsizlik məsələsi" ilə əlaqələndirsə də, buna dair hələlik konkret sübutlar göstərməyib. "İran hakimiyyəti ölkədəki bəhailəri əqidələrinə görə məhv etmək niyyətindədir"- deyə, Bəhai icmasının BMT-dəki nümayəndəsi xanım Diane Alai Trend -a bildirib.
Bəhai icmasının yaydığı məlumata əsasən, İranda ötən bir ay ərzində azı 12 bəhai həbs olunub. BBC-nin mayın 28-də yaydığı məlumatda bildirilir ki, tutulanlar arasında 7 nəfər bəhai lideri var və bu əqidədə olan İran vətəndaşlarının həbsi davam etdirilir. İran rəsmiləri isə, bəhailərin həbsinin ölkənin milli təhlükəsizliyi ilə bağlı olduğunu iddia edirlər. Həbslər aprelin 12-də Şiraz şəhərində baş vermiş partlayışdan iki həftə sonra başlayıb.
"İranda bəhailərin kütləvi həbsi təhlükəsizlik məsələsi ilə qətiyyən bağlı deyil"-deyə, Alai cümə günü Genevrədən telefonla bildirib.
Onun sözlərinə görə, bundan əvvəl də İran hakimiyyəti dəfələrlə bəhailəri həbs edib. Həbs olunanlar arasında müsəlmanlığı qəbul edəcəyinə söz verənlər məhkəməyə verilməyib, öz əqidəsində qalanlar isə, böyük həcmdə maliyyə girovu qoyaraq, azadlığa buraxılıblar. Alai bildirib ki, İran inqilabından (1979-cu il) bəri yüzlərlə bəhai əqidəsinə görə edam olunub: "İran hakimiyyəti bəhailərə əqidəsinə görə təzyiq göstərdiyini danır və indiyədək bəhailərin ölkənin milli təhlükəsizliyini pozmasına dair bircə fakt belə göstərməyib. İranın da qoşulduğu Beynəlxalq İnsan Haqları Konvensiyasının 18-ci maddəsi "əqidə azadllığı" ilə bağlıdır. Ona görə də, rəsmi Tehranın bəhailərə təzyiqi qanunsuzdur"- deyə, Alai bildirib.
"Amnesty İnternational təşkilatı, BMT İnsan Haqları Şurasının Ali komissarı xanım Luisa Arbur, BMT-nin insan haqları, din və vicdan azadlıqları üzrə məruzəçisi Əsma Cahangir və başqa rəsmilər İran hakimiyyətinin bəhailərə təzyiqlərini dayandırması üçün təkliflər planı hazırlayıblar. Biz bu təkliflərin İran hakimiyyəti tərəfindən qəbul olunmasına ümid edirik" - deyə, bəhai icmasının BMT-dəki nümayəndəsi bildirib.
1844-cü ildə İranın Şiraz şəhərində bəhai dini yaranmağa başlayıb. Bəhailər Şeyx Bəhaəddini özlərinin peyğəmbəri hesab edirlər. İrandakı bəhai icmasının məlumatına görə, hazırda dünyada 7 milyon bəhai yaşayır. Onlardan 300 mini İranda yaşayır.
İran inqilabından sonra, xüsusilə də 80-ci illərdə azı 200 bəhai edam olunub. Hazırda İranda bəhailiklə mübarizə fondları fəaliyyət göstərir. İranın dini liderlərindən Hüseynəli Müntəziri hakimiyyətin bəhailərə təzyiqinin haqsız olduğunu vurğulayaraq, onların vətəndaş hüquqlarına hörmətlə yanaşılmasını tələb edib.
