Azərbaycan, Bakı, 04 iyun/ Trend , müxbir C.Babayeva/ Azərbaycan müxalifətini təmsil edən Milli-Demokrat Partiyasının (AMDP) daxilində "Azadlıq" partiyası ilə birləşməklə bağlı narazılıqlar var. Partiyanın əksər üzvləri müstəqil fəaliyyətin tərəfdarıdırlar. Bu barədə çərşənbə günü Trend -a AMDP-nin qurultaya hazırlıq üzrə Təşkilat Komitəsinin sədri Oqtay Xəlilli bildirib.
Trend -un arayışı: AMDP sədri, Azərbaycanın sabiq daxili işlər naziri İsgəndər Həmidov siyasətdən getdiyini bəyan edib. Həmidov istefasını partiyada sədrliyə layiq şəxslərin olması və onlara yol açmaq istəməsi ilə izah edib. Hazırda partiya sədrinin səlahiyyətlərini keçmiş sədrin müavini, partiyanın IV qurultayına hazırlıq üzrə Təşkilat Komitəsinin sədri Xəlilli icra edir. Həmidov AMDP və "Azadlıq" partiyalarının birləşməsinin tərəfdarıdır və bu məsələ ilə bağlı ilkin razılıq əldə olunub.
Xəlillinin sözlərinə görə, partiya daxilində narazılıq olsa da, "Azadlıq" partiyası ilə birləşmək məsələsinə qurultayda baxılacaq.
Hazırda AMDP-nin rayon təşkilatlarının konfranslarının keçirildiyini bildirən Xəlilli bütün rayon təşkilatlarının konfranslarının başa çatmasından sonra partiyanın IV qurultayının keçirilmə vaxtının müəyyən olunacağını bildirib. "Qurultayın sentyabr ayının birinci yarısında keçirilməsi nəzərdə tutulub", - deyə o bildirib.
Xəlilli qeyd edib ki, qurultayın gündəliyinə partiyanın 2008-ci il prezident seçkisində iştirak forması və yeni sədrin seçilməsi məsələləri də çıxarılacaq. "AMDP-nin prezident seçkisində müxalifətdən olan kənar namizədi dəstəkləyəcəyi gözlənilir", - deyə o bildirib.
Xəlillinin bildirdiyinə görə, AMDP-nin Böyük Məclisinin üzvü, "Milli Yol" qəzetinin baş redaktoru Şahin Ağabəyli partiyanın sədrliyinə namizədliyini irəli sürməsi barədə Təşkilat Komitəsinə rəsmi müraciət təqdim edib. ""Azadlıq" partiyasının sədri Əhməd Orucun da partiyanın sədrliyinə namizədliyi irəli sürülə bilər", - deyə o bildirib.
Məqalə müəllifi ilə əlaqə saxlamaq üçün ünvan - trend