Türkiyə, Ankara, 07 iyun / Trend müxbir T.Əliyev/ Türkiyədə Konstitusiya Məhkəməsinin, tələbə qızların universitetlərə baş örtüsü ilə daxil olmasına icazə verən və parlamentdə qəbul edilən Konstitusiya dəyişikliyini ləğv etməsindən sonra bütün diqqət bundan sonra baş verəbiləcək hadisələrə yönəlib.
Tələbə qızların universitetlərə baş örtüsü ilə daxil olmasına şərait yaradan Konstitusiya dəyişikliyi hakim Ədalət və İnkişaf Partiyası və onu bu məsələdə dəstəkləyən müxalif Milliyyətçi Hərəkat Partiyasından olan 411 millət vəkilinin dəstəyi ilə qəbul edilmişdi. Ancaq, bu addımı Türkiyənin dünyavi dövlət əsaslarına təhlükə kimi qiymətləndirən müxalif Cümhuriyyət Xalq Partiyası və digər solçu qüvvələr həmin təşəbbüsə qarşı çıxaraq, Konstitusiya Məhkəməsinə müraciət etmişdilər.
Konstitusiya Məhkəməsinin 2 gün əvvəlki qərarı Türkiyədə birmənalı qarşılanmayıb.
Bu qərarı dəstəkləyənlər olduğu kimi, sərt tənqid edənlər də var.
Hakim Ədalət və İnkişaf Partiyası isə həmin qərarı Konstitusiyanın pozulması kimi qiymətləndirib.
Bir çoxları Konstitusiya Məhkəməsini parlamentin səlahiyyətlərinə aid məsələlərə qarışmaqda günahlandıraraq, parlamentin sədrini buna münasibət bildirməyə çağırıblar.
Türkiyə Böyük Millət Məclisinin sədri Koksal Toptan vəziyyətdən çıxış yolu kimi yeni Konstitusiyanın qəbul edilməsini təklif edib.
Bu gün bütün Avropada olduğu kimi Türkiyə də Futbol üzrə Avropa Birinciliyini və xüsusi ilə Türkiyənin ilk maçını səbirsizliklə gözləyirdi. Baş nazir Rəcəb Tayib Ərdoğanın bu günkü Portugaliya-Türkiyə görüşünü izləmək üçün Cenevrəyə getməsi planlaşdırılırdı. Ancaq ölkə daxilində baş verən proseslər Ərdoğanın səfərinə maneə oldu.
Hakim partiya Konstitusiya Məhkəməsinin qərarından sonra atacağı addımları müəyyənləşdirməyə çalışır. Partiyadan olan bütün millət vəkillərinə Ankaranı tərk etməmək tapşırılıb.
Məlumdur ki, hakim partiya Konstitusiya Məhkəməsini qərarını Konstitusiyaya zidd addım kimi dəyərləndirib.
Bəzi hüquqşünaslar da Konstitusiya Məhkəməsini səlahiyyətlətrini aşmaqda günahlandırır.
Hətta məhkəmənin qərarını "hüquqi çevriliş" kimi qiymətləndirənlər də var.
Baş nazir Ərdoğanla görüşən parlament sədri Köksal Toptan bu gün mətbuat konfransı keçirərək, Konstitusiya Məhkəməsini səlahiyyətlərini aşmaqda günahlandırdı, bunun demokratiya baxımından zərərli olduğunu qeyd etdi. O, bu cür halların qarşısını almaq məqsədi ilə yeni Konstitusiya ilə birlikdə ikipalatalı parlament sisteminin də müzakirəyə çıxarılmasını təklif etdi.
Toptan qarşıdakı günlərdə isə ölkədə qarşılıqlı etimad abu-havası və sabirtliyin qorunmaıs üçün bütün Məclisdə təmsil edilən bütün siyasi partuya liderlərinin iştirakı ilə görüş keçirmək istədiyini bildirdi.
Müşahidəçilərin əksəriyyətinin fikrincə Konstitusiya Məhkəməsinin qərarı həmin qurumda baxılmaqda olan AK partiyanın bağlanması haqqındakı iddianın da taleyinə təsir edəcək.
Onların fikrincə partiyanın bağlanacağı ehtimalı artıb.
Məhz bu səbəbdən hakim partiyanın qarşıdakı günlərdə atacağı addımlar böyük maraq doğurur.
Bəzi yerli kütləvi informasiya vasitələri hakim partiyanın güc göstərmək məqsədi ilə hətta növbədənkənar parlament seçkilərinə gedə biləcəyi ehtimalı haqqında mülahizələr irəli sürürdülər.
Partiyanın nümayəndələri bu ehtimalları təkzib etsələr də, atılacaq addımlar haqqında hələ konkret fikir söyləmirlər.
İndi Türkiyədə hadisələrin bundan sonra hansı istiqamətdə inkişaf edəcəyini maraqla gözlənilir.