Azərbaycan, Lənkəran, 18 iyun / Trend , müxbir P.Əliyeva/ Azərbaycanın cənub bölgəsi olan Lənkəran rayonunda yol hərəkəti qaydalarının pozulması ötən illə müqayisədə artıb. Bu barədə çərşənbə günü Trend -a Lənkəran rayon Yol Polisi Bölməsinin rəisi Nəsimi Məmmədov məlumat verib.
Trend -un arayışı: 2008-ci ilin 5 ayında 1601 yol hərəkəti qaydalarının pozulması faktı qeydə alınıb ki, bu da ötən ilin müvafiq dövrü ilə müqayisədə, 74 fakt çoxdur. Ötən ilin müvafiq dövründə bu rəqəm 1527 olub. 2007-ci ildə isə, ümumilikdə 3692 yol hərəkəti qayda pozuntusu baş verib.
2007-də bölmənin xidməti ərazisində 19 yol-nəqliyyat hadisəsi baş verib, 11 nəfər həlak olub, 15 nəfər xəsarət alıb. Ələt-Astara magistral yolunun Lənkəran ərazisindəki hissəsində baş vermiş 14 hadisədə 12 ölüm, 23 yaralı, ümumilikdə rayon ərazisində 33 hadisə, 23 ölüm, 38 yaralı olub. 2007-ilin 5 ayında 6 ölüm, 3 yaralı olub.
Məmmədov deyib ki, 2008-ci ilinn 5 ayında bölmənin xidməti ərazisində baş vermiş 5 yol nəqliyyat hadisəsi zamanı 2 nəfər həlak olub, 3 nəfər xəsarət alıb. Bölmə rəisi yol-nəqliyyat hadisələrinin baş verməsi səbəbini yolların ensiz olması, işıqfor və yol nişanlarının çatışmaması, bəzi sürücülərin səriştəsizliyi və avtomobillərin sayının çoxalması ilə izah edib. Məmmədov ötən ay 65 yol nişanının dəyişdirildiyini, ayın sonunadək daha 20-sinin yenisi ilə əvəz ediləcəyini bildirib.
Lənkəran paytaxt Bakıdan 270 kilometr cənubda yerləşir.
Məqalə müəllifi ilə əlaqə ünvanı: [email protected]
