Azərbaycan, Bakı, 10 iyul / Trend , müxbir D.Xatınoğlu/ Qərb İranın keçirdiyi son hərbi təlimi və raket sınağını özünə qarşı real təhlükə hesab etməsə də, bu addım İsrail, yaxud ABŞ tərəfindən İranın hücuma məruz qalma ehtimalını artırır. " Iran özünü qaçılmaz müharibə şəraitinə salıb" - Vaşinqtonda fəaliyyət göstərən Müasir İran Tədqiqat Mərkəzinin sədri Möhsün Sazegara Trend -a bildirib.
İran iyulun 8-də hərbi təlim keçirib. İRNA Agentliyinin məlumatına əsasən, ölkə daxilində naməlum bir regionda keçirlilən təlimdə İran İnqilab Keşikçiləri Korpusunun (Sepah) istehsal etdiyi "Şahab 3" orta məsafəli ballestik raketin yeni növü sınaqdan keçirilib. ABŞ, Fransa, Almaniya, İtaliya və İsrail bu hərbi təlimi pisləyib.
"İran raketlərini sınaqdan keçirməklə, İsrail və Amerikanı onları gözləyən təhlükədən xəbərdarlıq edib", - deyə Sazegara cümə axşamı telefonla Vaşinqtondan bildirib. Onun sözlərinə görə, rəsmi Tehran ölkəyə hər növ hucuma cavab olaraq İsraili raket hədəfinə alacağını göstərmək istəyir.
Sepahın yaradıcılarından olan Sazegaranın sözlərinə görə, İran hakimiyyəti və Sepah hazırda elə bir istiqamət götürüb ki, arxada qalan körpüləri dağıdıb və ölkəni müharibə ilə üz-üzə qoyub. "Amerikanın regionda, İsrailin isə öz sərhədlərində raket əleyhinə müdafiə sistemləri var. Digər tərəfdən, İran raketlərinin atma məsafəsini artırmaqla, yanacaq həcmini də eyni dərəcədə artırmalıdır. Buna nail olmaq üçün raketin başlığının çəkisini azaltmaq lazımdır, yəni, sadə dildə desək, İran raketlərin atma məsafəsini artıra bilər, lakin bu halda partlayış qüvvəsini azaltmalıdır. "Şahab 3" raketi 2000 km məsafəni hədəfə alsa da, gücü bir-iki evi belə uçurmağa yetməz", - deyə Sazegara hesab edir.
Qərb İranın nüvə proqramını dayandırmaq üçün bü ölkəyə qarşı iqtisadi-siyasi sanksiyalar tətbiq edib. Amerika iddia edir ki, İran nüvə silahı istehsal etməyə çalışır, lakin İran bunu rədd edir. İran rəsmiləri dəfələrlə İsraili yer üzündən siləcəkləri barədə bəyanatlar səsləndiriblər. İsrail isə İranın nüvə silahını özünə təhlükə hesab etdiyi üçün, rəsmi Tehran nüvə proqramını davam etdirəcəyi təqdirdə, İrana hücumunu istisna etmir.
Bundan əvvəl, "Nyu-York Tayms" qəzeti iyunun 19-da İsrailin Aralıq dənizi sahillərində keçirdiyi hərbi paradı İrana hücum mesajı kimi dəyərləndirmişdi.