...

Aralıq dənizi İttifaqı: ərəb ekspertlərin baxışı

Siyasət Materials 15 İyul 2008 16:38 (UTC +04:00)

Azərbaycan, Bakı, 15 iyul/ Trend müxbir Ü.Sadıqova/Aralıq dənizi İttifaqının təcəssüm etdirdiyi bütün iqtisadi və beynəlxalq perspektivlərə baxmayaraq, Yaxın Şərq üçün bu, 13 il əvvəlbaşlamış Barselona prosesinin davamıdır.

"Aralıq dənizi İttifaqı və Barselona sazişi arasında heç bir fərq yoxdur. Buna görə də bu, ərəb dünyası üçün heç bir vacib rol oynamır", - ərəb ekspert Adil Atey Trend -a bildirib.

Aralıq dənizi İttifaqı bazar ertəsi Parisdə keçirilən sammitdə yaradılıb. Sammitdə Avropa, Şimali Afrika və Yaxın Şərqin 43 ölkəsinin dövlət və hökumət başçıları iştirak ediblər. İttifaqın yaradılması fikri Fransa prezidenti Nikolya Sarkoziyə məxsusdur.

"Aralıq dənizi İttifaqı Barselonada keçirilən konfransdakı danışıqları xatırladır. Məlum olduğu kimi, bu proses müsbət nəticə verməyib", - Atey çərşənbə axşamı telefonla Brüsseldən Trend -a bildirib.

1995-ci ildə Barselonada Avro-Aralıq dənizi tərəfdaşlığı konfransı keçirilib. Konfrans "Barselona prosesi" adını almış dövlətlərarası əməkdaşlıq prosesinə start verib.

Atey hesab edir ki, Yaxın Şərqin Qərb ölkələri ilə münasibətlərindəki problemləri həll etmək üçün Aralıq dənizinin yeni təşkilatı digər siyasi kurs götürməlidir. "İttifaqın yalnız yeni siyasi strategiyası ərəb ölkələrinin Avropa ilə münasibətlərinə yardım edə bilər", - ekspert söyləyib.

Bundan əlavə, belə rəy var ki, Aralıq dənizi İttifaqı Şərq və Qərb arasında yeni iqtisadi münasibətlər yaradacaq. Siyasi problemlərin həllində isə, digər yol tələb olunur. "Nəzərə almaq lazımdır ki, Yaxın Şərqdə problemlər siyasi xarakter daşıyır. Nə iqtisadi, nə də sosial münasibətlər Qərb və Şərqin münasibətlərində olan çətinlikləri aradan qaldırmağa yardım etməyəcək",- ərəb ekspert Əbu Eyn çərşənbə axşamı telefonla Rəmallahdan Trend -a bildirib.

Eyn digər ərəb ekspertlərlə razıdır ki, bu ittifaqın yaradılmasında əsas təşəbbüskar kimi, Sarkozi iqtisadi baxımdan pozitivliyə görə onda xüsusi yer tutmağa can atır. "Aralıq dənizi Yaxın Şərqlə münasibətlərin tənzimlənməsində Avropa üçün yollardan biridir", - o bildirib. Əbu Eynin rəyinə görə, Ərəb dünyasına əvvəl siyasi və yalnız sonra iqtisadi məsələləri həll etmək lazımdır.

Müstəqil livanlı ekspert Kərim Kərim hesab edir ki, münasibətlərin tam bərpasına xeyli vaxt və Avropa və ərəb ölkələri arasında danışıqlar tələb olunur.

"Sarkozi Fransanın Aralıq dənizində möhklənməsi üçün bu addımı atıb. Tərəflər arasında bütün problemlərin həlli üçün bir görüş kifayət deyil", - Kərim bu gün Beyrutdan telefonla Trend -a bildirib.

Kərimin sözlərinə görə, ərəb ölkələri və Avropa bu əməkdaşlığı davam etdirmək arzusunda olduqlarını bildirməlidirlər.

Paris sammitində bir neçə "tarixi görüş" baş tutub. Aljazeera-nin bazar ertəsi verdiyi məlumata görə, Suriya prezidenti Bəşər Əsəd və Livan prezidenti Mişel Süleyman iki ölkə arasında diplomatik münasibətlərin bərpası haqqında razılığa gəliblər. Sammitdə Suriya-Livan münasibətlərindən başqa, Fələstin-İsrail dialoqunun problemləri müzakirə olunub.

Əhalisi 750 mln. nəfər olan ölkələrin daxil olacağı yeni təşkilatın əsas vəzifələri sırasında qanunsuz immiqrasiya ilə mübarizə və Aralıq dənizi ölkələrinin münasibətlərinin möhkəmlənməsi var.

Müəlliflə əlaqə saxlamaq üçün elektron ünvan - [email protected]

Xəbər lenti

Xəbər lenti