Azərbaycan, Bakı, 16 iyul/ Trend , müxbir V.Javoronkova, E.Tariverdiyeva/ Ermənistanın birinci prezidenti Levon Ter-Petrosyanın başçılığı ilə erməni müxalifətinin ölkənin eks-prezidenti Robert Köçəryanı Haaqa tribunalına vermək tələbi ilə imza toplaması, fevralda keçirilən prezident seçkilərinin nəticələrinə yenidən baxmaq cəhdindən daha çox, siyasi fitnədir.
"İmza toplanması aksiyası ədalət axtaran şəxslərin aksiyası deyil. Bunun motivləri siyasi əsasa malikdir", - siyasət məsələləri üzrə analitik və Avropa Siyasəti Mərkəzinin proqramının əməkdaşı Amanda Akçakoca (Amanda Akçakoca) Trend -a bildirib.
Erməni müxalifəti Ermənistanın birinci prezidenti Levon Ter-Petrosyanın başçılığı ilə bu gündən etibarən, Ermənistanın ikinci prezidenti Robert Köçəryana qarşı Haaqa tribunalına iddia təqdim etmək üçün imza toplayır. Bu barədə eks-prezident Levon Ter-Petrosyanı dəstəkləyən "Ümumxalq hərəkatı" Mərkəzinin nümayəndəsi David Şahnazaryan çərşənbə günü məlumat verib.
Onun sözlərinə görə, Robert Köçəryanın bir müddət əvvəl verdiyi müsahibə müxalifəti imza toplamağa təhrik edib. Müxalifətin rəyinə görə, müsahibədən belə fikir çıxır ki, Köçəryan 1 mart hadisələri zamanı hüquq-mühafizə orqanlarının hərəkətlərinə dair qərarı şəxsən qəbul edib.
Müxalifətin prezidentliyə namizəd Ter-Petrosyanın başçılığı ilə seçkilərin nəticələrinə dair etiraz aksiyaları martın 1-2-də qarışıqlığa və mitinqçilərin polislə toqquşmalarına çevrilib. Baş prokurorluğun məlumatlarına görə, 265 nəfər zərər çəkib, 10 nəfər həlak olub, 100 - dən çox insan həbs olunub.
"Erməni müxalifətinin imza toplama aksiyası, çox ehtimal ki, əsas məqsədi siyasi mövqeyin nümayişi və siyasi rəqiblərinin diskreditasiyası olan piar-aksiyadır", - Rusiyanın Siyasi Araşdırmalar İnstitutunun direktoru Markov çərşənbə günü telefonla Trend -a bildirib.
Ekspertlər Köçəryana qarşı işin Haaqa tribunalına veriləcəyinə şübhə edirlər.
"Onun cinayəti Haaqaya verilməsi üçün kifayət qədər çəkiyə malik deyil. Beynəlxalq Məhkəmənin Ermənistanda baş vermiş bu insidenti araşdırmaqdan daha vacib problemləri var", - Cənubi Qafqaz üzrə avropalı ekspert Akçakoca bildirib.
Markovun rəyinə görə, əslində, Köçəryana qarşı işin məhkəməyə verilməsi üçün heç bir əsas yoxdur. "Abstrakt Haaqa tribunalı anlayışı yoxdur. Bu sistem yalnız hərbi cinayətlərin araşdırılması üçün mövcuddur", - ekspert söyləyib.
Onun sözlərinə görə, bir neçə tribunal mövcuddur -keçmiş Yuqoslaviyada, Ruandada və s. ölkələrdə hərbi cinayətlərin araşdırılması üçün tribunallar. Ekspert bildirib ki, heç kəs martın 1-də Ermənistanda baş vermiş insidentin araşdırılması üzrə Haaqa tribunalı yaratmayacaq.
Akçakoca isə hesab edir ki, erməni müxalifətinin seçkilərin düzgün aparılmaması barədə məsələ qaldırmaq üçün, ümumiyyətlə, səbəbi olmayıb. Onun rəyinə görə, Ermənistanda seçkilərin nəticələrinin saxtalaşdırılması, İrəvanın bir neçə rayonu istisna olmaqla, geniş yayılmayıb. Ekspert Sərkisyanın, seçki turundan asılı olmayaraq, istənilən halda qələbə qazanacağını hesab edir.
"Yəqin ki, seçkilər daha ədalətli keçirilsəydi, ikinci tur baş tutardı və bu turda istənilən halda Sərkisyan qələbə qazanardı", - Akçakoca bildirib.
Sözsüz ki, son hadisələr ölkədə siyasətə güclü təsir etməyəcək. Ekspert hesab edir ki hakim partiya birmənalı olaraq iqtidarda qalacaq.
Haaqa tribunalı BMT tərəfindən hərbi cinayətlər üzərində beynəlxalq ədalətin həyata keçirilməsi üçün Nürnberq tribunalının məntiqi varisi kimi təsis edilib. Keçmiş Yuqoslaviyada kommunist diktatoru Slobodan Miloşeviçin totalitar rejiminin insanlığa qarşı cinayətləri onun yaradılmasına təkan verib.
"Erməni siyasəti üçün bəyanatların şişirdilməsi və öhdəliklərin götürülməsi adi işdir. Təcrübədə cavab vermək vaxtı gəldikdə isə, onlar, adətəən, kölgəyə çəkilirlər", - Akçakoca əlavə edib.
