...

"Azərbaycanda ciddi bir narazılıq, dəyişiklik ehtirası yoxdur" - partiya sədri

Siyasət Materials 26 İyul 2008 11:25 (UTC +04:00)

Azərbaycan, Bakı, 26 iyul/ Tr , müxbir E.Babayev/ Azərbaycanın müxalif Vətəndaş Həmrəyliyi Partiyası (VHP) bu il keçiriləcək prezident seçkisinin hakimiyyət dəyişikliyi ilə nəticələnməyəcəyi qənaətindədir. "Hazırda Azərbaycanda ciddi bir narazılıq, etiraz, dəyişiklik ehtirası yoxdur", - deyə şənbə günü Trend -a VHP sədri, millət vəkili Sabir Rüstəmxanlı bildirib.

Trend -un arayışı: Azərbaycanda növbəti prezident seçkisinin oktyabrın 15-də keçirilməsi nəzərdə tutulur.İndiyə qədər Müsavat Partityasının başqanı İsa Qəmbərin, Azərbaycan Demokrat Partiyasının sədri Sərdar Cəlaloğlunun, Yaşıllar Partiyasının sədri Mais Güləliyevin, Bütöv Azərbaycan Xalq Cəbhəsi Partiyasının sədri Qüdrət Həsənquliyevin, Müasir Müsavat Partiyasının sədri Hafiz Hacıyevin namizədliyi təmsil olunduqları partiyalar tərəfindən irəli sürülüb. Bundan başqa, "Azərbaycan Naminə" İctimai Forumun rəhbəri Eldar Namazov müstəqil şəkildə namizədliyini irəli sürüb. Hakim Yeni Azərbaycan Partiyası isə hazırki dövlət başçısı İlham Əliyevin namizədliyini irəli sürmək niyyətindədir. İqtidaryönlü Ana Vətən və Sosial Rifah partiyaları seçkidə İlham Əliyevin namizədliyini müdafiə etmək qərarı veriblər. Üç müxalifət partiyasının (Azərbaycan Xalq Cəbhəsi, Vətəndaş və İnkişaf, Liberal) təmsil olunduğu "Azadlıq" bloku isə seçkiləri boykot edəcəyi barədə qərar verib. VHP isə seçkidə hansı formada iştirak edəcəyinə iyulun 27-də partiyanın Ali Məclisində aydınlıq gətirəcək.

Rüstəmxanlı dəyişikliyin baş verməsi ehtimalının yox dərəcəsində olmasını iki səbəblə izah edib. Onun sözlərinə görə, bunlardan biri ölkədə baş verən ümumi inkişafdır. "İkinci bir səbəb isə iqtidardan narazı qüvvələrə rəhbərlik edənlərin qeyri-ciddi adamlar olmasıdır", - deyən Rüstəmxanlı hesab edir ki, bir sıra müxalifət liderləri seçdikləri yola, hadisələrə münasibətdə qeyri-dürüst davranırlar. "Seçicilər də bunu görür. Təbii ki, bu insanlar alternativ saydıqları adamların bu qədər qeyri-ciddi olduğunu görəndə iqtidarın namizədindən yapışmaqdan başqa çıxış yolu görmürlər. Bu, reallıqdır və kimsə buna etiraz edə bilməz", - deyə o qeyd edib.

VHP Milli Azadlıq Hərəkatının liderlərindən olan Rüstəmxanlının rəhbərliyi altında 1992-ci il 26 sentyabrda bir qrup ziyalı tərəfindən yaradılıb. 3 noyabr 1992-ci ildə dövlət qeydiyyatına alınan VHP 1995, 2000, 2005-ci ilin parlament, 2003-cü ilin prezident, 1999, 2004-cü ilin bələdiyyə seçkilərində iştirak edib. Partiyanın sədri millət vəkili, xalq şairi Rüstəmxanlı 1991-95-ci illərdə mətbuat və informasiya naziri, 2003-cü il prezident seçkilərində isə prezidentliyə namizəd olub.

Məqalə müəllifi ilə əlaqə ünvanı: [email protected]

Xəbər lenti

Xəbər lenti