Azərbaycan, Bakı, 06 avqust / Trend , müxbir E.Babayev/ Azərbaycanın xalq artisti Flora Kərimova prezident seçkilərində iştirak edəcəyini açıqlayıb. "Mən seçkidə mütləq iştirak edib, səs verəcəyəm. Artıq mən hər şeyə yeni gözlə baxıram", - çərşənbə günü Trend -a Kərimova bildirib.
Trend -un arayışı: Azərbaycanda prezident seçkiləri oktyabrın 15 - də keçiriləcək. Üç müxalifət partiyasının (Xalq Cəbhəsi, Liberal, Vətəndaş və İnkişaf) təmsil olunduğu "Azadlıq" bloku, Klassik Xalq Cəbhəsi Partiyası seçkiləri boykot etmək barədə qərar verib. Müsavat, Vətəndaş Həmrəyliyi, Demokrat, Böyük Quruluş partiyaları isə, seçkidə öz namizədləri ilə iştirakdan imtina ediblər.
İndiyə qədər növbəti prezident seçkilərində iştirak etmək üçün Mərkəzi Seçki Komissiyasına (MSK) 11 nəfər müraciət edib. Siyasi təşkilatlardan hakim Yeni Azərbaycan Partiyasının namizədi İlham Əliyevin, Ümid Partiyasının sədri İqbal Ağazadənin, Müasir Müsavat Partiyasının sədri Hafiz Hacıyevin, Bütöv Azərbaycan Xalq Cəbhəsi Partiyasının sədri Qüdrət Həsənquliyevin, Liberal-Demokrat Partiyasının sədri Fuad Əliyevin, Yaşıllar Partiyasının sədri Mais Güləliyevin sənədləri MSK-ya təqdim edilib. Bundan başqa, Yaşar Əhmədovun (işsiz), Əlimuxtar Əkbərovun (təqaüdçü), Sevinc Quliyevanın (Sumqayıt Mərkəzi Klinik Xəstəxanasında sanitar), Vüqar Seyidovun (həkim), Qüdrət İsaqovun (AMEA Fizika İnstitutunun aparıcı elmi işçisi) sənədləri MSK-ya təqdim edilib.
Kərimova Azərbaycan Xalq Cəbhəsi Partiyasının sədri Əbülfəz Elçibəy vəfat etdikdən sonra fəal şəkildə siyasi proseslərə qoşulub. O, 2000- ci ildə AXCP parçalanandan sonra təşkilatın Mirmahmud Mirəlioğlunun rəhbərlik etdiyi "klassiklər" qanadında siyasi fəaliyyətini davam etdirib.
Kərimova kimə səs verəcəyini açıqlamaq istəməyib. O, bundan sonra heç vaxt siyasətlə məşğul olmayacağını bildirib. "Mənim siyasətə qayıtmağımdan söhbət belə gedə bilməz. Açıq şəkildə elan edirəm ki, siyasətdən tam getmişəm",
Kərimova bildirib ki, artıq o, müxalifətin heç bir tədbirində iştirak etmir. "Mən könüllü şəkildə siyasəti tərk etmişəm. Xatırlatmaq istəyirəm ki, 2000 - ci ilə qədər heç bir partiyanın üzvü deyildim. Əbülfəz Elçibəy rəhmətə gedəndən sonra siyasi partiyanın üzvü oldum" - deyən Kərimova 2005 - ci il seçkilərində iştirak etdiyini də yada salıb. O qeyd edib ki, seçkilərin nəticələrindən narazı qalıb və bundan sonra siyasətdən getmək barədə yekun rəyə gəlib.
Məqalə müəllifi ilə əlaqə ünvanı: [email protected]