Azərbaycan, Bakı, 19 avqust / Trend , müxbir İ.Əlizadə/ Azərbaycanın Ümumdünya Ticarət Təşkilatına üzv olması ilə bağlı məsələ Qara Dəniz İqtisadi Əməkdaşlıq Təşkilatı Parlament Assambleyasının (QİƏT PA) İqtisadi Komitəsinin sentyabrın 9-10-da Bakıda keçiriləcək iclasında müzakirə olunacaq.
"Azərbaycanın Ümumdünya Ticarət Təşkilatına üzv olmağa çalışdığı bir vaxtda bu toplantının böyük əhəmiyyəti vardır", çərşənbə axşamı Trend -a QİƏT PA sədrinin müavini, Azərbaycanın qurumdakı nümayəndə heyətinin rəhbəri Asəf Hacıyev bildirib.
Trend -un arayışı: QİƏT PA-da 12 ölkə təmsil olunur.
Hacıyev qeyd edib ki, komitənin iclasında Qara dəniz bölgəsi ilə Ümumdünya Ticarət Təşkilatı arasında əməkdaşlıq məsələləri müzakirə olunacaq.
"Müzakirə olunan məsələ Baş Assambleyanın noyabrda keçiriləcək iclasına çıxarılacaq. Qəbul olunacaq tövsiyələr isə üzv ölkələrin parlamentlərinə göndəriləcək", - Hacıyev əlavə edib.
Onun sözlərinə görə, komitənin iclasının əvvəlcə oktyabrda keçirilməsi planlaşdırılsa da, həmin dövrdə Azərbaycanda prezident seçkiləri keçirildiyi üçün iclasın vaxtı sentyabra dəyişdirilib.
Məqalə müəllifi ilə əlaqə ünvanı: [email protected]
