Fransa, Strasburq, 03 oktyabr/ Trend , müxbir A.Məhərrəmli/Yalnız həqiqətin üzə çıxması gürcü - osetin münaqişəsinin tərəfləri üçün barışığa yol aça bilər, - Avropa Şurası Parlament Assambleyasının (AŞPA) nümayəndə heyətinin rəhbəri Lyuk Van der Brande hesab edir.
"Məsulliyət hissini dərk edərək, həqiqi dialoqun qurulmasına, konkret addımların atılmasına nail olmaq və dərindən araşdırma aparmaqla yanaşı, hərəkət də etmək lazımdır", - cümə günü Trend -a Van der Brande bildirib.
Onun sözlərinə görə, gürcü - osetin münaqişəsinin müzakirəsi çox açıq bir şəraitdə keçirilib və nəticədə, aydın məzmunlu bir qətnamə qəbul edilib.
Dünən AŞPA gürcü - osetin münaqişəsi üzrə yekun qətnaməni qəbul edib. Müzakirələrin gedişində Rusiya tərəfinin təklif etdiyi düzəlişlər qəbul edilməyib. Qətnamədə göstərilib ki, həm Gürcüstan, həm də Rusiya Avropa Şurasının prinsip və dəyərlərini, eləcə də münaqişənin sülh yolu ilə həll edilməsi öhdəliyini pozublar. Tərəflərdən hər biri insan hüquqlarının pozulmasına görə bərabər məsuliyyət daşıyırlar.
"Sənəddə göstərilir ki, böhranın qaranlıq qalan məqamlarını aydınlaşdırmaq üçün beynəlxalq araşdırma aparılmasına ehtiyac var. Onu da demək lazımdır ki, hər iki tərəf müharibənin başlanmasında məsuliyyət daşıyır. Onlar Avropa Şurasına üzv olarkən üzərlərinə götürdükləri öhdəliklərə zidd hərəkət ediblər", - Van der Brande qeyd edib.
Onun sözlərinə görə, Rusiya tərəfindən Cənubi Osetiya və Abxaziyanın müstəqilliyinin tanınması AŞ-nin qaydalarına uyğun deyil. O, qaçqınlarla bağlı problemi də qeyd edib.
"Onların təhlükəsizlik şəraitində oz yurdlarına qayıtmasını və həyatlarının yenidən normal şəkildə qurulmasını təmin etmək lazımdır. Bunun üçün Avropa İttifaqının və ya digər beynəlxalq müşahidəçilərin bufer zonasına, eləcə də Cənubi Osetiyadakı zonalara çıxışı təmin edilməlidir", - o vurğulayıb.
AŞPA - nın qəbul etdiyi qətnamədən irəli gələn öhdəliklərlə bağlı Van der Brande qeyd edib ki, Rusiya tərəfinin üzərinə götürdüyü öhdəliklərin yerinə yetirilməsinə nəzarət etmək üçün monitorinq tətbiq olunacaq.
