Əfqanıstan, Kabil, 27 oktyabr / TrendNe , müxbir A. Həkimi / Əfqanıstan xalçalarına dünya bazarlarında marağın azalması bu ölkədə narahatlıq doğurur. Rəsmi statistikaya əsasən, dünya bazarlarına ildə 1,5 milyon kv.metr Əfqanıstan xalçası ixrac olunur. Əfqanıstanın xalça ixracatının 90% -i Pakistan ölkəsi vasitəsi ilə Pakistan xalçaları adı ilə dünya bazarlarına çıxarılır.
Əfqanıstanın ixracın inkişafı idarəsinin sədri seyid Süleyman Fatimi Trend - a bildirib ki, Əfqanıstan dövləti xalçaçılıqdan ildə 370 milyon dollar gəlir əldə edir.
Bu gün Kabildə ikinci beynəlxalq xalçaçılıq sərgisi keçirilir. Sərgi xalçaçılar, xarici müəssisələr və dövlət strukturları tərəfindən təşkil olunub. Üç gün davam edəcək sərgi Babir bağında keçirilir. Burada Əfqanıstanın müxtəlif regionlarından 100 - ə yaxın xalça istehsal edən şirkət iştirak edir.
Fatimi bildirib ki, sərgi Əfqanıstan xalçaçılıq sənətinin dünya bazarlarında tanınması məqsədi ilə təşkil olunub və satışa 25 min kvmetr xalça çıxarılıb.
Birinci beynəlxalq xalçaçılıq sərgisi ötən il Kabilin Serina otelində keçirilmişdi.
Fatimi əlavə edib ki, Əfqanıstan xalçaçılıq sənətinin tanınması və bu sənətə sərmayələrin cəlb edilməsi məqsədilə dövlət xüsusi proqram hazırlamalıdır.
Onun sözlərinə görə, Əfqanıstanın ixracın inkişafı idarəsi "ixracat komitəsinin yaradılması" proqramını, bu ölkədə ixrac və ticarətin vəziyyətinin yaxşılaşdırılması məqsədilə dövlətə təqdim edib.
Fatimi əlavə edib ki, ölkədə xalçaçılıq sənəti ilə məşğul olan tacirlər, xalçaçılığa mənfi təsir göstərmiş iqtisadi böhrandan əziyyət çəkir.
Kabil şəhərinin xalça ixracatı birliyinin sədri Hadi Fərzam Əfqanıstan xalçalarına dünya bazarlarında marağın artırılması məqsədilə bu sənət üzrə birjanın yaradılmasını təklif edir.
Əfqanıstan Ticarət Palatası rəyasət heyətinin sədri Məhəmməd Qurban Həqcu Trend - a bildirib ki, dövlətin xalçaçılıq sahəsinə diqqətinin az olması, qısa və uzun müddətli kreditlərin aşağı faizlə verilməməsi, xalça toxuyanlar üçün şərait yaradılmaması və təhlükəsizliyin təmin edilməməsi Əfqanıstan xalçalarına dünya bazarlarında marağın azalmasının əsas səbəblərindəndir.
"Əfqanıstan xalçalarına dünya bazarında marağı artırmaq məqsədilə bu sahəyə sərmayə yatıranlar və xalça toxuyanları dəstəkləmək üçün fond yaradılmalıdır", - deyə Qurban Həqcu bazar ertəsi Trend - a bildirib.
Ticarət naziri Məhəmməd Əmin Fəhən bildirib ki, xalçaçılıq sahəsində çalışan tacirlər üçün kreditlərin ayrılmasına şərait hazırlarınır.
Bir qədər əvvəl Əfqanıstan xalçaları Almaniyada keçirilən beynəlxalq sərgilərin birində birinci yeri tutmuşdu.
Əfqanıstan xalçalarının ən böyük rəqibləri İran və Türkiyə xalçalarıdır. Bu iki ölkə xalçaçılıq sənətinin inkişafı üçün əlverişli şərait yaradıb.
Həqcu bildirib ki, Əfqanıstan tacirləri xalça istehsalı və ixracı üzrə digər ölkələrlə rəqabət aparmaq iqtidarında deyillər.
Hazırda Əfqanıstanda lazımi şəraitin olmaması bu ölkənin xalçaçılarını Pakistanda fəaliyyət göstərməyə vadar edib. Pakistan dövləti də bu xalçaçıları dəstəkləyir.
Əfqanıstan əhalisinin əksəriyyətinin gəlir mənbəyi xalça toxuculuğudur.
Məqalə müəllifi ilə əlaqə ünvanı: [email protected]
