Azərbaycan, Bakı , 12 noyabr/ Trend , müxbir R.Novruzov/ Avropa Şurasının Azərbaycan üzrə həmməruzəçisi hesab edir ki, siyasi partiyalar dölət büdcəsindən maliyyələşdirilərkən partiyaların təkcə ölkə parlamentində təmsil olunması deyil, onların cəmiyyətdə nüfuzu nəzərə alınmalıdır.
Azərbaycanın "Siyasi partiyalar haqqında" Qanunu 1992 - ci ildə qəbul olunub. İndiyədək ona heç bir əlavə və düzəliş edilməyib. Qanuna dəyişiklik, əsasən, siyasi partiyaların dövlət büdcəsindən maliyyələşdirilməsini nəzərdə tutur.
Müxalifət qeydiyyatdan keçən bütün siyasi partiyalara dövlət büdcəsindən maliyyə ayrılmasını təklif edir. Azərbaycan hakimiyyəti isə, büdcədən maliyyə vəsaiti ayrılanda parlament seçkilərində iştirak edən və qanunverici orqanda daha çox yeri olan partiyalara üstünlük verilməsi mövqeyindən çıxış edir.
Azərbaycanda 52 partiya Ədliyyə Nazirliyində dövlət qeydiyyatına alınıb. Hazırda Milli Məclisdə 12 siyasi partiya təmsil olunur.
"Partiyanın cəmiyyətdə dəstəyə malik olub - olmaması mövqeyindən çıxış etmək daha məntiqli olardı. Bundan çıxış etməklə dövlət maliyyələşdirilməsinin həcmini müəyyən etmək olar", - deyə çərşənbə günü Trend -a Tallindən telefonla Avropa Şurası Parlament Assambleyasının (AŞ PA) həmməruzəçisi Andreas Herkel bildirib.
Herkel bildirib ki, dünya təcrübəsində bu məsələdə müxtəlif yanaşmalar var. Parlamentdə partiyaların maliyyələşdirlməsi xüsusunda qanunverici orqana seçilmək üçün olduqca yüksək hədd olmmalıdır. "Hesab edirəm ki, 3 -5 faizlik dəstəyə malik olan partiyalar maliyyə dəstəyi almalıdır. Yalnız parlamentdəki partiyaların maliyyələşdirməsi nəzərdə tutularsa, bu, parlamentə daxil olmaq üçün hədd kimi müəyyən oluna bilər. Partiyanın 10 faizlik dəstək qazanması və maliyyə dəstəyi almamasının olduqca gülməli vəziyyət olması ilə razılaşın", - deyə Herkel bildirib.
Milli Məclisin İcra Aparatnın rəhbəri Səfa Mirzəyev bildirib ki, bütün partiyalar dövlət büdcəsindən maliyyələşə bilməz. Onun sözlərinə görə, maliyyə dəstəyini Milli Məclisdəki seçkilərdə müəyyən nailiyyət əldə etmiş, daha doğrusu, ölkə daxilində 4 - 5 faiz səs toplamış siyasi partiyalar alacaq.
Məqalə müəllifi ilə əlaqə ünvanı - [email protected]