Azərbaycan, Bakı, 14 noyabr/ Trend , müxbir Ü.Sadıqova/ Fələstinin hakim FƏTH partiyası HƏMAS müqavimət hərəkatı və İsrail arasında mümkün hərbi toqquşmalarda iştirak etməyəcək. Belə ki, bu, Fələstində yeni genişmiqyaslı müharibəyə gətirə bilər.
"FƏTH-in Qəzzə Zolağında İsrailə qarşı göndərmək üçün qoşunu yoxdur", - FƏTH partiyasının mətbuat katibi Zəarir Rəmallahdan telefonla Trend -a bildirib.
Ötən həftə İsrail HHQ-nin Qəzzə Zolağının cənubuna aviazərbəsi nəticəsində, HƏMAS qruplaşmasının altı üzvü öldürülüb, onlarla insan yaralanıb.
İsrail və HƏMAS islam hərəkatı arasında qarşıdurma qaçılmazıdr. Bununla əlaqədar olaraq, İsrail ordusu sayıqlığını və hazırlığını saxlamalıdır", - İsrailin müvəqqəti hökumətinin Baş naziri Ehud Olmert cümə axşamı Qəzzə Zolağı yaxınlığındakı hərbi bazanın təftişi zamanı bildirib, - Sinxua agentliyi xəbər verir.
Fələstin muxtariyyətinin hakim FƏTH partiyası Fələstin ərazisində yeni hərbi əməliyyatların başlamasını tənqid edir.
"Bizim üçün Fələstin xalqı vahiddir. Bununla əlaqədar olaraq, İsrailin hara zərbə endirəcəyindən asılı olmayaraq, bu bütün Fələstində yeni müharibənin başlanğıcı ola bilər", - Fəhmi Zəarir bildirib.
Lakin onun sözlərinə görə, FƏTH HƏMAS və İsrail arasında mümkün hərbi toqquşmalarda iştirak etməyəcək; bu, üç tərəf arasında genişmiqyaslı müharibəyə gətirəcək.
İki il ərzində HƏMAS və FƏTH arasında münasibətlər gərgin olub və bu, dəfələrlə Fələstin partiyalarının üzvləri arasında qarşılıqlı həbslərə gətirib.
Yeni toqquşmalar HƏMAS-a həm iqtisadi, həm də insan itkiləri baxımından baha başa gələ bilər. Lakin hərəkatın liderləri FƏTH-ə qoşunlarını Qəzzə Zolağına yeritməyə imkan verməyəcəklər, - Çatham Haus (Chatham House) Britaniyanın Kral İnstitutunun beynəlxalq siyasət analitiki Yossi Mellkeberq (Yossi Mellkeberg) hesab edir.
2006 -cı ildə HƏMAS muxtariyyətdə keçirilmiş parlament seçkilərində qələbə qazanıb. Bir ildən sonra hərəkat FƏTH hökumətinin üzvlərini Qərb Sahilindən qovaraq, bu ərazini nəzarəti altına alıb.
FƏTH HƏMAS ilə milli dialoqda maraqlıdır. Ötən həftə Qahirədə Fələstin muxtariyyətinin lideri və FƏTH-in rəhbəri Mahmud Abbas və HƏMAS hərəkatının lideri İsmayıl Haniyə arasında danışıq olmalıydı, lakin danışıqlar baş tutmayıb; HƏMAS Qərb Sahilində 400 tərəfdarının həbs edilməsi ilə əlaqədar, bu danışıqları boykot edib. FƏTH-in imkanı olsa belə, qoşunlarını Qəzzəyə yeridəcəyi ehtimal azdır.
İki fələstin hərəkatı arasında milli dialoq səmərəli olsaydı, sözsüz ki, İsraillə barışığa doğru addım atılardı, - Yaxın Şərq üzrə Beynəlxalq Media Mərkəzinin (International Middle East Media Center) direktoru, fələstinli analitik Corc Rişmavi (George Rishmawi) hesab edir.
Rişmavinin rəyinə görə, HƏMAS ilə dialoq FƏTH üçün Qərb Sahili və Qəzzə Zolağı hökumətlərinin münasibətində sabitlik və deməli, İsraillə danışıqlarda irəliləyiş və atəşkəs haqqında yeni sazişin imzalanması deməkdir.
İyunda Misirin vasitəçiliyi ilə İsrail HƏMAS və Qəzzə Zolağının bəzi qruplaşmaları ilə altı ay müddətində atəşkəs haqqında saziş imzalayıb.
Fələstin Muxtariyyətinin (FM) rəhbəri HƏMAS və İsrail arasında müvəqqəti atəşkəs haqqında sazişin müddətinin uzadılmasını dəstəkləyir və tərəflərə yeni analoji sənəd imzalamağı təklif edir, - FƏTH- in mətbuat katibi bildirib.
Bu toqquşmaların gələcəyinə cümə axşamı TSAXAL ordusunun HƏMAS- ın hücumu dəf etmək üçün Qəzzə ilə sərhəddə NMB-i gücləndirdiyini bəyan edən İsrailin müdafiə naziri Ehud Barak aydınlıq gətirib.
Bununla əlaqədar olaraq, gələn ay -sazişin müddətinin başa çatdığı vaxtda İsrail, çox ehtimal ki ,öz ordusunu Qəzzəyə yeridəcək, lakin bu, Zolağın İsrail ordusu tərəfindən tam işğal edilməsi ilə başa çatmayacaq, - britaniyalı analitik Mellkeberq hesab edir.
1987-ci ildə təşkil edilmiş islam müqaviməti hərəkatı 1988-ci ildə birinci Fələstin intifadı zamanı daha parlaq fəaliyyət göstərib. Yaranmasının ilk günlərindən hərəkatın əsas məqsədi işğal edilmiş Fələstin ərazilərinin azad edilməsi olub.
Hərəkat 2006 - cı ildə parlament seçkilərində qələbə qazandıqdan və Qəzzə Zolağını öz nəzarəti altına aldıqdan sonra, HƏMAS və FƏTH-in münasibətləri pozulub.
Müəlliflə əlaqə saxlamaq üçün elektron ünvan - [email protected]
