Azərbaycan, Bakı, 29 noyabr / Trend , müxbir R.Hafizoğlu / Fələstin silahlı qrupları tərəfindən ölkə ərazisinin raket hücumuna tutulmasına cavab olaraq İsrail hökumətinin Qəzzəyə tətbiq etdiyi blokada şərti xarakter dayışır.
"İsrailin Qəzzə zolağına tətbiq etdiyi blokada şərti xarakter daşıyır", - deyə İsrailin Hərbi Münaqişələr Dövründə Uşaq Hüquqlarını Müdafiə Komitəsinin sədri Eli Zarxin Trend -a bildirib.
Zarxinin fikrincə, fələstinli terror qruplarının İsrailin yaşayış məntəqələrini raket zərbəsinə tutmasına cavab olaraq, ölkəsi sadəcə öz sərhədlərini bağlayıb.
"İsrail Qəzzəyə tam şəkildə blokada tətbiq etmir. Qəzzənin Misirlə sərhəd buraxılış məntəqələri açıqdır. Tətbiq olunan blokada sadəcə, İsrailin təhlükəsizliyini təmin etmək üçündür", - deyə Zarxin qeyd edib.
Zarxin onu da əlavə edib ki, İsrail hökumətinin terror aksiyalarına cavab olaraq Qəzzə zolağına hərbi müdaxilə etməməsinin əsas səbəbi orada dins əhalinin də məskunlaşması ilə bağlıdır.
"İsraillilər Qəzzəyə hərbi müdaxilə edilməsinin əleyhinədirlər. Çünki hərbi müdaxilələr zamanı terrorçulardan fərqli olaraq, dinc əhali daha çox əziyyət çəkir", - deyə o əlavə edib.
Qəzzə ərazisindən yəhudi yaşayış məntəqələrinin raket zərbəsinə tutulmasına cavab olaraq, artıq bir aydan çoxdur ki, İsrail Qəzzə zolağı ilə sərhədlərini bağlayıb.
Məqalə müəllifi ilə əlaqə : [email protected]
