Azərbaycan, Bakı, 29 noyabr/ Trend , müxbir D.Xatınoğlu/ Azərbaycan və Əfqanıstan parlamentləri əməkdaşlıq haqqında saziş imzalayacaqlar.
"Saziş, Əfqanıstan Milli Asambleyasının sədri Yunis Qanuninin 30 noyabr-2 dekabr tarixində Bakıya qarşıdakı səfəri çərçivəsində imzalanacaq", - Əfqanıstan parlamentinin Baş katibi İbrahim Hacı şənbə günü Kabildən telefonla Trend -a bildirib. Əfqanıstan parlamenti sədrinin Bakıda prezident İlham Əliyev, azərbaycanlı həmkarı Oqtay Əsədov və xarici işlər naziri Elmar Məmmədyarovla görüşü planlaşdırılıb.
Əfqanıstan parlamentinin rəhbəri Bakıda Azərbaycanın Əfqanıstandakı sülhməramlı fəaliyyətini müzakirə edəcək.
Əfqanıstanda Beynəlxalq Təhlükəsizliyə Yardım Qüvvələrinin strukturunda 45 azərbaycanlı xidmət göstərir. Bu hərbi qulluqçular Kabildə post-patrul xidmətini həyata keçirirlər.
Ötən ay Azərbaycan parlamenti Əfqanıstandakı sülhməramlılarının sayını 2 dəfə artırıb və onların sayını 90-a çatdırmaq barədə qərar qəbul edib. Yaxın günlərdə 45 hərbi qulluqçu Əfqanıstana göndəriləcək.
Müəlliflə əlaqə saxlamaq üçün elektron ünvan: [email protected]
