...

Azərbaycanın Sol Qüvvələr Birliyi potensialı olmayan partiyaların hesabına genişlənməyəcək

Siyasət Materials 10 Dekabr 2008 12:38 (UTC +04:00)

Azərbaycan, Bakı, 10 dekabr / Trend , müxbir C.Babayeva/ Azərbaycanın Sol Qüvvələr Birliyinin genişlənməsi məsələsində əsas kriteri keyfiyyət olacaq.

"Tərkibi geniş olan birliyin fəaliyyəti daha effektli olar. Sol Qüvvələr Birliyi yalnız potensialı olan partiyaların hesabına genişlənə bilər", - deyə Birliyin həmtəsisçisi Azərbaycan Kommunist Partiyasının (AKP) sədri Rauf Qurbanov çərşənbə günü Trend -a bildirib.

Trend -un arayışı: Azərbaycanın Sol Qüvvələr Birliyində dörd soltəmayüllü partiya - Azərbaycan Sosialist, Kommunist, Vahid Kommunist partiyaları və Marksizm-Leninizm platformasında Azərbaycan Kommunist Partiyası təmsil olunur. Birliyin yaradılmasında məqsəd bələdiyyə və parlament seçkilərində vahid platformadan çıxış etməkdir.

Azərbaycanda bələdiyyə seçkisi gələn il, parlament seçkisi isə 2010-cu ildə keçiriləcək.

Qurbanovun sözlərinə görə, əsasnamədə Birlikdə təmsil olunmaq istəyən partiyalara ciddi tələblər qoyulacaq. "Əsas tələb partiyanın potensialı, kifayət qədər rayon və şəhər təşkilatlarının olması ilə bağlı olacaq. Azərbaycanın istər sol, istərsə də sağ təmayüllü partiyaları arasında elə partiyalar var ki, yalnız sədr və möhürdən ibarətdir. Potensialı olmayan solçu partiyaların birlikdə təmsil olunmasının əleyhinəyəm", - deyə AKP sədri bildirib.

O, zərurət yaranacağı halda Birliyin genişlənməsini istisna etməyib. "Əsasnamənin tələblərinə cavab verən partiyalar birliyə üzv ola bilər. Potensialı olmayan partiyaların birliyə üzv olması vaxt itirmək və həmin partiyanın özünü reklam etməsi kimi qiymətləndirilə bilər", - deyə AKP sədri bildirib.

Qurbanov Sol Qüvvələr Birliyindən kənarda olan solçu partiyalar arasında potensialı olan partiyaların olduğunu bildirib. "Həmin partiyalar arasında özünü bu birlikdə görmək istəməyən və müstəqil fəaliyyətə üstünlük verənlər var. Onların qərarlarına hörmətlə yanaşırıq", - deyə o bildirib.

Azərbaycanda 52 siyasi partiya dövlət qeydiyyatına alınıb.

Məqalə müəllifi ilə əlaqə saxlamaq üçün ünvan: [email protected]

Xəbər lenti

Xəbər lenti