Azərbaycan, Bakı, 12 yanvar / Trend , müxbir A.Hüseynbala/ Azərbaycanın müxalif partiyalarının təmsil olunduğu ittifaq referendumla bağlı təşəbbüs qrupu yaradıb.
"Demokratiya Uğrunda İttifaqın Sədrlər Şurasının bu gün keçirilən iclasında "Azərbaycan Xalq Cümhuriyyəti" təşviqat qrupunun yaradılması qərara alınıb", - bazar ertəsi Trend -a DUİ-də təmsil olunan Klassik Xalq Cəbhəsi Partiyasının (KXCP) sədri Mirmahmud Mirəlioğlu bildirib
Trend -un arayışı: Azərbaycan parlamenti ötən ayın sonunda keçirilən iclasında Konstitusiyaya əlavələr və dəyişikliklər edilməsi ilə bağlı referendumun martın 18-də keçirilməsi barədə qərar qəbul edib.
Konstitusiyanın 29 maddəsinə dəyişiklik edilməsinə dair referendumun keçirilməsi barədə qərar verilib.
Azərbaycan Respublikası Konstitusiyasının mətninə dəyişikliklər yalnız referendum vasitəsilə daxil edilə bilər (maddə 152). AR Konstitusiyasının mətninə dəyişikliklər Milli Məclis və ya prezident tərəfindən təklif edilirsə, o zaman təklif edilən dəyişikliklər üzrə əvvəlcədən AR Konstitusiya Məhkəməsinin qərarı alınmalıdır (maddə 153).
Azərbaycan Konstitusiyası 1995 - ci ildə referendum yolu ilə qəbul olunub, 2002 - ci ildə Əsas Qanuna əlavə və dəyişikliklər edilib. Azərbaycanın hakim partiyası "Yeni Azərbaycan", müxalif Müsavat Partiyası "Respublikaçılar" təşəbbüs qrupları yaradıblar. Mərkəzi Seçki Komissiyası YAP-ın təşəbbüs qrupunun qeydə alınması üçün bildiriş verib.
Bundan əlavə "Azadlıq" blokuna daxil olan Xalq Cəbhəsi, Milli Birlik Hərəkatı, Vətəndaş və İnkişaf partiyaları, o cümlədən "Azərbaycan Naminə" İctimai Birlik, Demokrat Partiyası və bir sıra qeyri-hökumət təşkilatları "Respublika və Qarabağ Uğrunda Vətəndaş Hərəkatı" təşəbbüs qrupunun yaradılması barədə qərar verib.
Hakim partiyanın icra katibinin müavini Mübariz Qurbanlı daha öncə Trend -a bildirib ki, müxalifət partiyalarının referendum əleyhinə yaratdıqları təşəbbüs qrupları effektsiz olacaq.
Yanvarın 10-da 21 media rəhbəri tərəfindən referendumu dəstəkləmək məqsədilə "Azad söz" Təşəbbüs Qrupu təsis edilib.
Həmin gün həmçinin Azərbaycan Həmkarlar İttifaqları Konfederasiyası (AHİK) və bir sıra QHT-lər Konstitusiyaya əlavə və dəyişikliklərə dair referendumla bağlı İctimai Təşkilatların Təşəbbüs Qrupunu təsis ediblər.
Onun sözlərinə görə, "Azərbaycan Xalq Cümhuriyyəti" təşəbbüs qrupu referendum əleyhinə təşviqat aparmaq məqsədilə yaradılan bütün digər təşkilatlarla əməkdaşlıq edəcək.
"DUİ-də təmsil olunan Azadlıq və Milli Demokrat partiyaları referendum əleyhinə olan yalnız millətçi qurumlarla əməkdaşlıq edəcəklərini bildirsələr də, qərarımız qüvvəsində qalır", - Mirəlioğlu əlavə edıb.
KXCP sədri deyib ki, DUİ-nin Sədrlər Şurasının iclasında Azəırbaycan Milli İstiqlal Partiyasının mətbuat və informasiya katibi Əli Orucov da iştirak edib: "İclasda DUİ-nin yaradacağı təşəbbüs qrupunda AMİP-in də iştirakı müzakirə olunub", - Mirəlioğlu qeyd edib.
Mirəlioğlu deyib ki, Müsavat Partiyasının yaratdığı "Respublikaçılar" təşəbbüs qrupunun formalaşmasında iştirak etməklə bağlı təklif alsalar da, bu, yalnız DUİ-nin təsis etdiyi qrup çərçivəsində əməkdaşlıq formasında olacaq.
Dеmокrаtiyа Uğrunda İttifаqı 2005-ci il parlamеnt seçkisindən sonra müxalifətçi Klassık Xalq Cəbhəsi, Azadlıq və Milli Demokratiya partiyaları yаrаdıb. 2008-ci il sеntyаbrın əvvəllərində Böyüк Azərbаycаn, nоyаbr аyındа isə Хаlq pаrtiyаlаrı DUİ-yə üzv qəbul оlunub. İttifаq bu pаrtiyaların məşvərət və əməkdaşlıq qurumudur.
Məqalə müəllifi ilə əlaqə ünvanı: [email protected]
