İran, Tehran, 22 yanvar / Trend , müxbir A.Namdari/ İranın Narkotiklərlə Mübarizə Idarəsinin Baş katibi bildirib ki, ölkədə sutkada 3 ton narkotik maddə müsadirə olunur. Onun sözlərinə görə, narkotik maddələrin ən çox tapıldığı region İranın cənub - şərqidir. O, İranda bu miqdarda narkotik maddə tapılmasından təəccübləndiyini bildirib.
"Əfqanıstanda dünyada istifadə olunandan iki dəfə çox narkotik maddə istehsal olunur. Baxmayaraq ki, BMT 2008-ci ildə 2007-ci illə müqayisədə, Əfqanıstanda narkotik maddələrin istehsalının azaldığını bildirir, lakin biz bunu hiss etmirik",-deyə İran Polis rəisi və Narkotiklərlə Mübarizə Idarəsinin Baş katibi İsmail Əhmədi Müqəddəm cümə axşamı İranın 6 əyalətinin narkotiklərlə mübarizə idarəsinin əməkdaşları ilə görüşündə bildirib.
BMT elan edib ki, Əfqanıstanda 2007-ci ildə 8 min 200 ton, 2008-ci ildə 7 min 700 ton tiryək istehsal olunub.
İranın Narkotiklərlə Mübarizə Idarəsinin mətbuat xidmətinin məlumatına əsasən, Əhmədi Müqəddəm bildirib ki, İranda narkotik maddələrin müsadirəsi sahəsində 25 faiz artım müşahidə olunur.
"Narkotik maddələrin müsadirəsində artım olsa da , bazar qiymətinə bir o qədər təsiri olmayıb. Bu, Əfqanıstanda tiryək istehsalının azalmadığını göstərir",-deyə Müqəddəm bildirib.
Müqəddəm əlavə edib ki, biz hegemon dövlətlər üçün hədəfə çevrilmişik. "İranı narkotik maddələrin tranziti və qəbulu bazarına çevirmək planlaşdırılmış məqsəddir",- deyə Müqəddəm bildirib.
Onun sözlərinə görə , əvvəllər hesab edirdilər ki, narkotik maddə olmazsa , narkotik istifadəçisi də olmaz, lakin bu cür düşünmək düzgün deyil. O, ictimaiyyətdə maarifləndirmə işlərinin davamlı şəkildə aparılmasının vacibliyini vurğulayıb.
Müqəddəm əlavə edib ki, dünyada müsadirə olunan narkotik maddələrin 93 faizi İrandadır. "Beynəlxalq təşkilatların rəyinə görə, İran narkotiklərlə mübarizədə dünyada qabaqcıl ölkələrdəndir",- deyə Müqəddəm bildirib.
O əlavə edib ki, ötən il ölkədə 600 minə yaxın narkotik istifadəçisi müalicə olunub, cari ildə bu rəqəmin 700 minə çatdırılmasına səy göstərilir.
Müəlliflə əlaqə saxlamaq üçün elektron ünvan: [email protected]
