Gürcüstan, Tbilisi, 26 yanvar/ Trend , müxbir N.Kirtsxaliya/ Gürcüstanın ATƏT-dəki səfiri Viktor Dolidze xarici işlər naziri Qriqol Vaşadze ilə Gürcüstandakı təşkilat müşahidəçiləri ilə bağlı ölkənin mövqeyini razılaşdırıb. Nazirlikdən verilən məlumata görə, görüş dünən keçirilib.
Gürcüstan ATƏT-in ölkədəki mandatının uzadılmasında israr edir. Rusiya bunun əksinə çıxış edir və Gürcüstan və Cənubi Osetiyada ATƏT-in iki müstəqil müşahidəçi mandatının tətbiq edilməsini tələb edir.
Nazir ilə məsləhətləşmədən sonra səfir Dolidze bildirib ki, Gürcüstan tərəfi öz mövqeyini dəyişmir, yəni Gürcüstanda ATƏT-in bir missiyası olmalıdır. "Biz ATƏT müşahidəçilərinin Gürcüstanın bütün regionlarına, o cümlədən separatçı Cənubi Osetiya və Abxaziyaya çıxışının olması mövqeyinin lehinəyik", - deyə o bildirib.
Gürcüstanda müşahidəçilərin fevralda müddəti başa çatacaq mandatının uzadılması məsələsi ATƏT Daimi Şurasının yanvarın 29-da keçiriləcək iclasında nəzərdən keçiriləcək.
Məqalə müəllifi ilə əlaqə ünvanı - [email protected]