İranın hərbi hava qüvvələrinin komandiri bildirib ki, 2009-cu ilin yay aylarında radardan yayına bilən təyyarənin sınaq uçuşları başlanacaq. Bu barədə İranın Fars xəbər agentliyi məlumat yayıb.
"Hazırda İranın Müdafiə Sənayesi Nazirliyi "Saiqə" və "Azərəxş" təyyarələrini istehsal edir. Hərbi hava qüvvələri mütəxəssisləri radardan yayına bilən təyyarənin istehsalına çalışır", - deyə İranın hərbi hava qüvvələrinin komandiri Həsən Şahsəfi bazar ertəsi Tehranda keçirilən İranın silahlı qüvvələr hərbi sənaye araşdırmalar festivalında jurnalistlərə bildirib.
Şahsəfinin sözlərinə görə, İranlı mütəxəssislər radardan yayına bilən təyyarənin istehsal işlərini tamamlamaq üzrədir.
"2009-cu ilin yay aylarında bu növ təyyarəni sınaqdan keçirə biləcəyik və radardan yayına bilən təyyarə uçuş əməliyyatına başlayacaq", - deyə Şahsəfi bildirib.