Azərbaycan, Bakı, 04 fevral / Trend , müxbir E.Tariverdiyeva/ Amerika hərbi kontingenti Qırğızıstandakı "Manas" hərbi bazasını tərk edəcəyi təqdirdə, baza Kollektiv Təhlükəsizlik haqda Müqavilə Təşkilatı (KTMT) qüvvələri tərəfindən istifadə oluna bilər. Bu barədə Rusiyanın NATO-dakı daimi nümayəndəsi Dmitri Roqozin hesab edir.
"Düşünürəm ki, "Manas" bazası amerikalıların oranı tərk etməsindən sonra bizə gərək ola bilər", - deyə Trend -a Brüsseldən telefonla Roqozin bildirib.
Bu gün Qırğızıstan hökumətinin Manasda Amerika hərbi bazasının bağlanması barədə qərarı məlum olub. Bu barədə Moskvada aparılan danışıqların yekunu üzrə keçirilən mətbuat konfransında Qığızıstan prezidenti Kurmanbek Bakıyev məlumat verib.
ABŞ-ın hərbi bazası koalisiya qüvvələrinin Əfqanıstanda apardıqları "Sarsılmaz azadlıq" antiterror əməliyyatlarına dəstək üçün BMT-nin mandatı üzrə 2001-ci ilin dekabrında Qırğızıstan paytaxtının beynəlxalq "Manas" aeroportu ərazisində yaradılıb.
Hazırda "Manas"da olan aviabazada ABŞ-ın mindən artıq hərbçisi, həmçinin hərbi-nəqliyyat təyyarələri mövcuddur.
Roqozin bildirib ki, artıq KTMT-nin iclası keçirilib və burada təcili əks təsir qüvvələrinin yaradılması barədə qərar qəbul olunub. O hesab edir ki, bunun üçün, sözsüz ki, KTMT üzvlərinin malik olduğu hərbi potensial lazım olacaq.
"Manas"ın gələcək istifadəsi üzrə hələ ki, konkret razılaşma əldə olunmayıb, lakin bu baza gələcəkdə KTMT qüvvələrinə gərək ola bilər", - deyə Roqozin bildirib.
Onun sözlərinə görə, KTMT çərçivəsində bu günkü görüşdən öncə, Qırğızıstan və Rusiya prezidentləri təkcə dövlətlərimizin xarici təhlükədən müdafiəsinin təmin edilməsi üçün siyasi və hərbi səylərin artırılması barədə söhbət aparmayıblar. Belə ki,Qırğızıstan tərəfi Rusiya tərəfinin amerikalılar ilə artıq iş görmək niyyətində olmaqları barədə məlumat verib.
Roqozinin sözlərinə görə, 2006-cı ildə ABŞ-ın "Manas" ərazisində taliblərlə mübarizədə gərəksiz olan AWACS təyyarələrinin yerləşdirməyə hazırlaşması barədə informasiya yayılmışdı.
"Buna görə, AWACS çox güman ki, Rusiya da daxil olmaqla regionda öz aviasiyası olan ölkələrin izlənməsi üçün yerləşdiriləcək", - deyə Roqozin bildirib.
Onun sözlərinə görə, əgər qərar rəsmən qəbul olunarsa, altı aydan sonra baza bağlanacaq.
"Bu, Birləşmiş Ştatlar qarşısında Əfqanıstandakı qruplaşmaları necə dəstəkləmək sualını qoyacaq", - deyə Roqozin bildirib.
Məqalə müəllifi ilə əlaqə ünvanı: [email protected]