Azərbaycan, Bakı, 20 fevral / Trend , müxbir Y.Ostapenko/ "Avropa təhlükəsizlik sisteminin islahatı yeni təhlükə və hədələrə cavab verməyə qadir olmaq üçün düzəlişlərdən və uyğunlaşmadan ibarət olmalıdır. Lakin onların reformasiyası yeni radikal institutların yaranması demək deyil",-Avropa İttifaqının aparıcı analitiki Antonio Missiroli (Antonio Missiroli) hesab edir.
"Düşünmürəm ki, NATO kimi təşkilatın islahata uğraması köklü dəyişikliklərə səbəb olsun",- Brüssellə telefon bağlantısı zamanı Avropa siyasi mərkəzinin müdiri Trend -a bildirib.
Avropanın mövcud təhlükəsizlik sisteminin yenidən nəzərdən keçirilməsi mövzusu son zamanlar geniş vüssət alıb. Sözü gedən məsələ cümə axşamı qış sessiyasına başlayan ATƏT-in də müzakirə mövzusu olub.
Sessiya zamanı Rusiya xarici işlər nazirinin müavini Aleksandr Qruşko yenidən Rusiya prezidenti Dmitri Medvedyev tərəfindən Avropada təhlükəsizlik sisteminin yenidən baxılması təklifini gündəmə gətirib.
"Soyuq müharibə" dövründə yaradılmış təşkilatlar hazırki çoxqütblü dünyanın problemləri həllinin öhdəsindən gələ bilmədikləri üçün, Qruşko Avropanı avroatlantik məkanda təhlükəsizlik barədə olan danışıqlara yenidən baxmağa çağırıb.
"Soyuq müharibə" dövründən fərqli olaraq yeni təhlükələrin olduğunu təsdiq edən Missiroli mövcud təşkilatların ləğvini də məqsədə uyğun saymır. O, hesab edir ki, həm hüquqi, həm də praktiki mənada öz axarları ilə fəaliyyət göstərən beynəlxalq təşkilatları ləğv etmək çox çətindir.
"Müəyyən məqsədlərdən başlayaraq onlara nail olub, sonra isə nəyin əldə olunduğundan nəticə çıxararaq hal hazırkı tələbatlara uyğun gəldiyini yoxlamaq lazımdır", - Missiroli hesab edir.
"Qərbi və Mərkəzi Avropada NATO-dan heç bir ölkə uzaqlaşmaq istəmir",- o, deyib.
NATO "soyuq müharibə" dövründə ABŞ və Avropanı SSRİ təhlükəsindən qorumaq məqsədi ilə 1949-cu ildə Vaşinqton müqaviləsi ilə yaradılmışdır. ATƏT isə "soyuq müharibə"dən sonra yaranmış institut olsa da, ekspertlərin fikrincə müasir dünyaya olan təhlükələrin öhdəsindən gələ bilmir.
Missiroli Avropa təhlükəsizlik strukturunun diskussiya mövzusu olduğunu təəcüblü və Rusiyanın yeni təklifini isə qeyri-səmimi hesab edir: "Heç kəs bilmir ki, Avropanın yeni təhlükəsizlik strukturunda kimlər iştirak edəcək, onun mahiyyət və məqsədləri nədən ibarət olacaq".
"Rusiya tərəfində yeni təhlükəsizlik planı barədə heç nə məlum deyil. Bu səbəbdən də biz əlimizdə olanlardan maksimum yaralanmaq niyyətindəyik", - Missiroli vurğulayıb.
Missirolinin sözlərinə görə, NATO-da alyansın alternativ məqsədlərinə qulluq edən bəzi kiçik dəyişikliklər planlaşdırılır. Aprel ayında Fransanın alyansa qayıtması müzakirə olunacaq.
Məqalə müəllifi ilə əlaqə ünvanı: [email protected]
