Azərbaycan, Bаkı, 22 aprel / Trend , müxbir A.Hüseynbala /
Azərbaycan parlamentinin deputatları orduya ictimai nəzarətin problemlərin həllinə müsbət təsir etdiyini deyirlər.
"Hər bir ölkədə Silahlı Qüvvələrə nəzarət praktikası var və Azərbaycanda da artıq bu praktika formalaşmaqdadır", - çərşənbə günü Trend -a hakim Yeni Azərbaycan Partiyası (YAP) Siyasi Şurasının üzvü, millət vəkili Aydın Mirzəzadə bildirib.
Trend -un arayışı: Azərbaycan parlamentinin deputatları vaxtaşırı hərbi hissələrə səfərlər edib, ordunun döyüş hazırlığı, hərbçilərin problemləri ilə maraqlanırlar. Növbəti səfərdə Milli Məclisin bir qrup deputatı ilə yanaşı, qeyri-hökumət təşkilatlarının, aparıcı kütləvi informasiya vasitələrinin nümayəndələri də iştirak edəcəklər.
Mirzəzadənin sözlərinə görə, ictimai nəzarətin əsas məqsədlərindən biri ordu haqqında cəmiyyətin daha çox məlumatlandırılmasıdır.
"Orduya aid olan məsələlər açıq müzakirə edilməlidir. İctimaiyyət nümayəndələri vaxtaşırı hərbi hissələrə səfər edib, vəziyyətlə yerində tanış olmalı, hər hansı problem varsa, onun vaxtında həllinə yardım göstərilməlidirlər", - hakim partiya nümayəndəsi əlavə edib.
Millət vəkili deyib ki, çağırış prosesində müəyyən yeniliklər baş verib. "Biz növbəti səfərimiz zamanı yeniliklərin ilkin nəticələri ilə tanış olacağıq. Orduya yeni çağırılan əsgərlərlə görüşüb, onların saxlanma, qidalanma şəraiti ilə maraqlanacaq, valideynləri ilə əlaqə, hərbi döyüş hazırlığının vəziyyəti ilə bağlı məlumat əldə edəcəyik", - Mirzəzadə vurğulayıb.
"Azərbaycan ordusuna məmurlarla yanaşı, bütün ictimaiyyətin nəzarəti olmalıdır", - çərşənbə günü Trend -a millət vəkili Həvva Məmmədova bildirib.
Onun sözlərinə görə, hər kəs ordu ilə əlaqə qurmalı, hamı ordunun dostu olmalıdır. "Biz hətta küçədə rastlasşdığımız əsgərimizi saxlayıb onun əhval-ruhiyyəsini soruşmalıyıq. Belə olarsa, ordumuz daha da güclənəcək, hərbçilərimiz daha sədaqətlə xidmət edəcəklər", - Məmmədova əlavə edib.
Millət vəkili deyib ki, orduya ictimai nəzarət prosesi başlayandan dəfələrlə hərbi hissələrə baş çəkib.
"Mən hər səfərim zamanı ordumuzda müsbət istiqamətdə irəliləyişlərin baş verdiyinin şahidi oluram. Düşünürəm ki, cəmiyyətin başqa təbəqələri də orduya ictimai nəzarət prosesində fəal iştirak etməlidirlər", - Məmmədova qeyd edib.
Məqalə müəllifi ilə əlaqə ünvanı:[email protected]