Azərbaycan, Bakı, 30 iyun / Trend , müxbir C.Babayeva /
Azərbaycanın müxalif Müsavat Partiyasının Gənclər Təşkilatı çərşənbə axşamı Təhsil Nazirliyinin qarşısında piket keçirməklə bağlı Bakı Şəhər İcra Hakimiyyətinə müraciət edib.
"Piketin iyulun 6-da günorta saatlarında "Şəffaf imtahan!", "Korrupsiyasız təhsil!" və "Rüşvət tələsinə son qoyulsun!" şüarları altında keçirilməsi nəzərdə tutulub. Aksiyada məqsəd Azərbaycanın orta məktəblərində keçirilmiş buraxılış imtahanlarının korrupsiya faktları və pozğunluqla müşayiət edilməsinə etiraz etməkdir", - çərşənbə axşamı Müsavat Partiyasının Gənclər Təşkilatının Trend -a daxil olan məlumatında bildirilib.
Trend -un arayışı: Azərbaycanın bütün orta ümumtəhsil məktəblərində buraxılış imtahanları iyunun 3-dən 16-dək səkkiz fənn üzrə keçirilib. İmtahanlarda 99630 şagird iştirak edib.
Buraxılış imtahanlarından 19770 nəfər şagird attestat ala bilməyib. Təhsil naziri Misir Mərdanovun jurnalistlərə bildirdiyinə görə, qeyri-kafi qiymət almış şagirdlər üçün təkrar buraxılış imtahanı keçirilməyəcək.
Müsavatçı gənclər etiraz aksiyası ilə Azərbaycan Hökumətinin və səlahiyyətli qurumların buraxılış imtahanlarından kəsilmiş gənclərə diqqətin ayrılmasını təmin etmək niyyətindədir. "Buraxılış imtahanından qeyri-kafi qiymət almış şagird və onların valideynlərini də aksiyada fəal iştirak etməyə çağırırıq", - məlumatda bildirilib.
Məqalə müəllifi ilə əlaqə ünvanı: [email protected]
